我會俾心機修行 法應
大家好，我叫華仔，香港出世，今年二十六歲。二零０五年七月入門，拜法玄師父為師成為祖師爺弟子，法號法應。
喺我未同大家分享我嘅經歷之前，首先我要多謝祖師爺同師父。因為喺我有事（兩次意外）而未係同師父咁熟嘅時候，祖師爺和師父救咗我。到我康復之後，師父改變咗我和幫助咗我好多，佢令我明白到每件事情嘅發生都係有因有果，又教識我好多做人嘅道理，我真係好多謝祖師爺和師父。
咁講翻我嘅經歷，喺二零０五年年頭，我剛剛做咗爸爸，做爸爸梗係開心啦！點知幾日後，我就遇上工業意外。記得嗰日，我如常返工，當時我喺一個電錶房負責打電炮嘅工作，點知道唔小心打中條電纜，跟住就發生爆炸！當時我都唔知點算，只知道自己被燒傷，幸好當時還清醒。同事馬上送我去沙田仁安醫院急症室，當值醫生立即為我診治，幫我洗傷口、打止痛針。之後醫生同我講我手部、面部都燒傷，耳仔仲燒到含膿出水，頭髮、眼眉毛、眼睫毛就燒到無哂。外母見到我，即刻通知我一位朋友，嗰位朋友就係我而家嘅大師兄「法增」。大師兄收到外母電話就立即通知師父，好彩師父當時喺香港(師父係居住在澳門的)。師父同大師兄馬上過嚟醫院探我，師父嚟到後立即施法幫我封身，仲話我會無事，而且塊面唔會有疤痕。師父要求我食素，當時我都唔明點解要食素，不過又覺得無所謂，始終身體唔係咁好，所以食清啲都係好事。於是我就照師父嘅意思開始食素。大師兄仲叫我太太和我一班好朋友一齊為我食素，因為師父話咁樣會幫到我康復，食素嘅功德力量好大。仲有我太太和一班好朋友當時竟然全部都肯為我食素，我真係好感動、好開心。因為要一班年青人食素始終係一件難事，但佢哋足足為我食咗一個星期！而我自己食素食吓一日，食吓又一日，只不過七日，我竟然已經可以出院！醫生同護士都話我康復得好快，以我燒傷嘅程度，正常係好難响七日後就出得院。
回家之後，我需要繼續為自己洗傷口同返醫院覆診。嗰陣時好想自己快啲好翻，可以照顧太太同仔仔；可以返工，始終手停口停嘛！我一路都有食素，唔經唔覺已經食咗個半月，我康復得好快，亦正如師父講，面上果然並無留有任何燒傷嘅疤痕。終於有一日飲早茶嘅時候，我食翻肉。始終耐冇食肉，當時食翻都有少少唔適應，但仍然繼續食。點知食肉食咗一個星期之後，就發生咗我人生第二次痛苦嘅意外。
記得嗰日係母親節，我約咗屋企人一齊飲早茶。點知瞓醒起身嘅時候，左邊肚嘅位置痛得好厲害，初時仲以為肚痛，但後來連呼吸都有困難，仲開始發冷，好辛苦，我立即叫太太叫救護車。突然醒起師父送咗啲供奉過祖師爺嘅茶葉俾我，於是叫太太即刻沖俾我飲，飲咗之後，真係覺得成個人定咗同無咁辛苦。然後打電話俾大師兄，咁啱大師兄同師父一齊喺大嶼山大佛旅遊。當時師父叫我唔使驚，跟住就立即透過電話施法幫我封身，封完身即刻感到冇咁痛。去到醫院，經醫生檢查後，話我左邊肺膜穿咗，需要立刻做手術！
手術後，傷口好痛，每日都要瞓喺床度，成個人唔郁得，一郁傷口就好痛，夜晚又瞓唔到，嗰段留醫嘅日子只可以用「痛苦」嚟形容。我好唔開心，不斷問自己：「點解又有意外發生喺自己身上？」自己猛咁喺度喊……好掛住屋企人，老婆同仔仔，老婆剛剛生完BB，仔仔又咁細，嗰陣時真係好擔心……師父同大師兄嚟醫院探我，叫我應該為自己從新食素。喺住院期間，我喺度諗點解要食素，嗰陣時我都唔知道、唔明白，後來同自己講就當係積福：唔殺生，食素係為咗自己嘅健康，為咗屋企人。而我太太和一班好朋友，亦全部再一次為我食七日素！真係好多謝佢哋！有呢班朋友真係好難得、好開心，我好感動，我亦好多謝太太！出院之後，逐漸習慣咗食素，到咗而家我都食咗素差不多三年了，身體反而更加健康、更加強壯！連食煙都戒埋。
後來接觸師父多咗，感受到師父待人接物都好有善心同耐性；甚至對於一啲唔認識嘅人，師父都會好盡心咁幫助，令我好感動；加上大師兄成日同我提及師兄弟入門前後嘅經歴，令我都好想入門，好想跟師父學習修行。大師兄叫我自己諗清楚，然後同師父講。我自己梗係好想入門，但係都要師父肯收我呢個徒弟，好彩最後師父都肯收我為徒。喺二零０五年七月我正式入門，成為祖師爺、法玄師父嘅弟子。一直以來，好多謝師父唔嫌辛苦教我誦經、唸佛、食素、練氣功，仲解釋誦經、唸佛、食素、練氣功對自己嘅好處，仲不時提點我要做好自己、對人要有善心同耐性。雖然我有時知道自己做得唔好，但我會去改。我應承過自己，我應承過師父，唔會令師父失望。我會俾心機去修行！
在此借錄《修心法語》中無極老祖嘅降示，嚟表達我修行嘅決心：
十年如一日
修行需踏實
珍惜此生緣
立地即成佛
我會俾心機去修行！
1,165 total views, 1 views today