[郭師兄]攝於西藏，2009年。
師父與 [郭師兄]攝於西藏。
2021.6.15（星期二）18:32
今天（15號）凌晨休息的時候，突然想起，[郭師兄]的辭世禮快將到來，要再提醒弟子安排訂送花牌一事，想着晚上與弟子確認下。十多小時之後，在壇做完功課，也完成清潔，就在急急開始準備晚飯的時侯……
[郭師兄]跟法玄說：「 師父，唔好嘥錢做花牌啦！有 師父誦經迴向已經好好啦，感恩 師父！感恩師兄師姐（ 師父弟子）！
真係好感恩，今生認識到 師父，又得 師父提點，說出我前生係出家道人，但只係得件衫（係道人），心唔係（出家、修行）！感恩 師父鼓勵同指導，令我今生有緣學佛學道，能夠有咁好嘅福報返到上去。
真係要多謝好多人，多謝二哥*，同（我自己嘅）家人、同道同修！ 師父您太忙啦，煮緊飯都要收「訊息」，感恩 師父！好多嘢想講，但見到 師父咁忙真係唔好意思！ 師父您好勁（笑，嘻嘻），煮飯好似移形換影咁，真係好犀利，甘拜下風！
閒話唔講住，（要）好認真多謝 師父、感恩 師父！希望 法玄師父好好保重（身體），好多人需要 師父。
師父，請您幫我多謝溫生，明白 師父無特意通知溫生，係唔想喺疫情期間再加灰暗顏色俾溫生，（佢都夠灰啦）！請 師父幫我同溫生講：『我已經離開（世）啦，去到好嘅地方。今生能夠相識都係因為 法玄師父，我好感恩，好珍惜，只係時間就係得咁多。好彩同 師父去過閬中參拜 （師父嘅） 祖師爺！又跟 師父去過西藏，真係好難忘。溫生保重！』
[郭師兄]與溫生，西藏。
師父您忙啦！唔好意思，阻您煮飯。 師父，真係好多好多說話想同 師父講。想同 師父分享死後發生咩事。
終於真係明白點解 師父成日同我哋講，要俾心機誦經，每日都要做好功課，要誠心，唔好懶。 師父，我暈之前，其實有先兆。就係前兩三日，心不在焉好似唔見咗啲嘢咁，但係唔知唔見咗啲乜，總之呀嘛，就係個心囉囉攣好唔舒服、好唔安樂，想搵返啲嘢。簡單講好似若有所失，個心唔安樂，想要認真搵嘢。
出事果日，覺得冇乜胃口唔想食嘢咁，就係食咗都好似唔係好「落格」，仲覺得飄飄然，但係唔知發生咩事，又冇話要想睇醫生嘅感覺。講出嚟，可能冇乜人相信，睇完（呢個因果同死前先兆資料）都唔會記得。
師父，第一次睇到你煮飯煮餸，覺得好有趣，同Irene*好唔同，嘻嘻！ 師父，唔好急， 師父，唔好急，我等你！真係唔好意思， 師父，哎⋯⋯睇完 師父咁樣（生活），我真係好慚愧，但係又幫唔到手。其實我都未食過 師父煮嘅飯餸，係緣份唔夠。（ 師父嘅弟子就食過 師父煮嘅飯菜）。」
（聽到 師伯手機放送音樂）[郭師兄]繼續說：「 師伯都鍾意聽下音樂⋯⋯我以前都係咁。師父講過，學道學佛同修心都係要靠自己，而且要恆持。
師父真係太忙，頭先（較早前）已經想同 師父講嘢㗎啦，不過 師父響壇做緊（功課同清潔），唔敢打擾。
師父，（因為等 師父，停下講下⋯⋯）唔知要點講好。
師父，我見到 二哥， 二哥帶我拜見咗 祖師爺！可以親自拜見 祖師爺，覺得好有福氣。 祖師爺好慈悲，開示我（在上界）修行方法。好感恩！
喺（繼續講番剛才話題），我暈嗰時，其實，應該係未暈嘅時候，已經好多靈體走埋嚟。當然，嗰時自己睇唔到，又感覺唔到。係一暈，（自己靈性）就『見到』好多好多『八卦嘅友仔（靈體）』，佢哋真係好八卦，唔係關心，係睇我死得未，幾時死，（以為我）死咗（佢地）就多個friend。
點知我未死得，死唔斷氣咁。佢哋覺得無計，好無癮⋯⋯對唔住，啱啱走咗無幾耐，仲未甩啲壞習慣，會改。我（剛才講嘢嘅用詞）唔係要對 師父無禮，只係形容番嗰時心情。嗰啲靈體，見我未斷氣，無嘢睇，各散東西。有一兩個真係好八卦嘅，跟咗車（救護車），跟埋去急症室，跟跟下都走埋。
師父，之前聽 師父講過醫院同急症室會有好多咩嘢（靈體）， 師父教過要念佛號，真嘅，真係好多。有啲好老，有啲傷殘嘅⋯⋯」
[郭師兄]見法玄忙煮飯，站在廚門口，一邊睇法玄準備晚飯，一邊同法玄講話：「 師父其實好乾淨好整齊，只係太忙，想再做多啲都無時間。
師父，真係快手，有飯食（啦）。唔講啦，再講 師父又係無啖好食。
係， 師父，請您幫我同（我）家人同朋友講聲，今生同大家做家人、親友、同學、同修，我好感恩，多謝大家，祝福大家事事順利，平安大吉！
多謝 師父，真係唔講啦， 師父要保重，好好休息。感恩 師父！」
玄說：唔好意思，[郭師兄]，疫情關係，未能親自出席辭世禮。
[郭師兄]：「唔緊要， 師父，感恩 師父！」
*二哥：法尊先師。
*[郭滿根師兄]：
2020年9月尾在住所後樓梯暈倒昏迷，被發現後送院，再轉入ICU (深切治療部)。住院期間，[郭師兄]一直昏迷，身體各器官出現衰竭，需靠儀器幫助維持生命，由於發病原因不明，醫生只有不斷為他做測試，嘗試找出病因；亦為他洗（清）血，洗腎，用強心藥等，醫生盡力救治，不停試藥，惜病情一直反複，沒甚好轉。
2021年5月27日（星期四）凌晨一點往生。
[郭師兄]前生是入了道的出家道人，只是沒真正用心修學，輕視了因果，「身穿道袍，心不在道。」 師父在第一次認識他時已告訴了他關於前生的事，著他今生要踏實修學；由於[郭師兄]前生是道家（出家）人， 師父尊重，所以稱他「郭師兄」。在這之前，他沒有宗教信仰，師父指引他起步，每天誦經，由學誦心經開始，以補當生假道人的因果。
*[Irene]：[郭師兄]在生時的太太，[Irene]於[郭師兄]離世之前的一年時間左右因病去世。
724 total views, 2 views today