師父：嗱，你自己都要學喎。你知唔知呀？知唔知道呀？(亞娣雙眼依然閉着，突然抬起頭)你都要學念「南無阿彌陀佛」(亞娣點點頭)，呢個 阿彌陀佛聖號。
亞娣：(不住點頭)哦！「南無阿彌陀佛」聖號……
師父：第一件事，師父話俾你聽呵，我哋 祖師爺就好慈悲嘅， 六壬仙師。
亞娣：(突然手指向壇，大聲說) 六壬仙師！唔係嘛？
師父：係呀。
亞娣：(雙手摸臉，摸頸，閉眼縐眉，狀甚不安) 六壬仙師……哎喲……(右手不停拍打後頸)
師父：做咩呀你？你想講咩？
亞娣：(雙手大力拍打大腿，之後突然定了格)我睇清楚先，睇吓邊個(突然大聲說) 六 壬 仙 師！(跪直身子)
師父：你想講乜嘢？
亞娣：(大聲)嗰次呀，又係六壬仙師吓！
師父：嗰次嗰個……
亞娣：(打斷 師父說話，手指指，大聲控訴)喺吔，你真係攪到我個心(新)抱，一塌糊塗！你睇屋企，依家乜都無嘅！( 師父：嗱，你聽……)乜都無嘅！嗰個……(手指指) ( 師父笑笑)喺吔！算喇算喇算喇，(雙手合十，放在臉前，不停拜拜)，Sorry，Sorry，我唔可以鬧你，得罪得罪得罪，(不停拜拜) Sorry，Sorry，Sorry，Sorry，Sorry，Sorry，Sorry，Sorry……
師父：妳記住啊呵……
亞娣：(打斷 師父說話，繼續不停拜拜)啊！得罪得罪得罪！呀！
亞娣突然跪直身體，右手用力掌嘴四下，然後雙手拍了一拍大腿，之後靜默。
師父： 祖師爺訓示，係咪？
亞娣：(點一點頭，低聲說)係呀。
師父：咁你聽咗就記住啊，即一間學校裡面有好學生，有壞學生，啱唔啱？明唔明白呀？(亞娣微微點一點頭)係啦，咁我哋 祖師爺都有好多唔同嘅弟子，有好多唔同嘅傳教嘅師傅(亞娣用力點一點頭)，依家壇前都有兩位師父喎，你知唔知道？
亞娣：(咧嘴一笑)，我梗係知啦！嘻！(開心笑)
師父：有林法玄啦，有林法尊喎，其實係同你之前見到嗰位六壬嘅師傅有少少分別，有啲分別，(亞娣笑)，係唔一樣嘅，但過咗去啦，都算啦，係咪？(亞娣用力點頭)咁依家你自己要好好哋去學習，知唔知道呀？(亞娣用力點頭)你係想超昇，即係想再入胎做番人嘅，投胎做人嘅，你自己要好努力喎，要好精進喎，要聽 祖師爺話，(亞娣用力不停點頭)，你要聽我哋 伏英老師公話，你要聽 觀音菩薩同埋 諸佛菩薩話，要好好哋去學習(亞娣合十拜拜)。第一件事唔需要再做乜嘢……嗰啲叫咩嘢呀？(在旁的亞冰說「揸大旗」) 「揸大旗」喇，唔好再「揸大旗」喇，知唔知呀？(亞娣用力點頭)你要好有能力，好有條件先可以「揸大旗」嘅(亞娣用力點頭)，人哋問到你，譬如下界裏面有人問到你，「嘩！你個心(新)抱可以幫我哋嗰喎！」「我心(新)抱乜都唔識㗎，淨係識念佛㗎啫。」你咁樣答佢，知唔知道呀？(亞娣用力點頭)，係啦，咁你同佢哋講喇，「你哋都自己念 「南無阿彌陀佛」聖號啦。」(亞娣用力點頭)你同佢哋講，「以後都唔好嚟搵我喇，亦都唔好搵我心(新)抱。」(亞娣點點頭)「你哋要搵，搵你哋嘅屋企人，搵啲正規師傅去幫你哋。」
亞娣：(突然扁嘴，手指指向後面門外)喺晒出邊啊！( 師父笑笑說「喺晒出邊。」)你同佢講！佢唔聽我講依家！( 師父、法尊師兄笑)，(亞娣顯得很驚慌)，佢蝦我，我幾廿歲，佢唔聽我講呀！(面有難色)
師父：佢哋唔係蝦你呀，佢哋心急想搵人幫佢哋之嘛。
亞娣：唔係！(指向後面)你同佢講！同佢講！
師父：一件事還一件事，係喇，咁你明唔明白呀？頭先同你講嘅嘢，明唔明白？
亞娣：(想了一想)啊！(聲調提高)我都念 「阿彌陀佛」(雙手合十)，下面有人問到，「你個心(新)抱係咪為人民？」「唔係！」……
師父：唔係咁樣講，如果佢問，「你心(新)抱可以幫到我個喎，你心抱幫我好唔好呀？」咁你話，「我心抱乜都唔識。」
亞娣：(點點頭，雙手繼續合十)哦，乜都唔識。
師父：淨係識念 「南無阿彌陀佛」。
亞娣：(點點頭) 哦！哦！
師父：記唔記住？
亞娣：(點點頭) 哦！
師父：係喇。唔係話「唔為人民」，唔係咁樣答。
亞娣：(點點頭) 哦……
師父：明白嘛？
亞娣：(點點頭) 明白！
師父：係喇。咁你自己又念囉喎。(亞娣點頭)識唔識念呀？
亞娣：(聳聳肩，列一列嘴，縐眉)「南無阿彌陀佛」，識念！(聳一聳肩)其他唔識啊。
師父：就咁樣啦，比啲心機，「南無阿彌陀佛」，「南無阿彌陀佛」，咁樣念，好冇？(亞娣答好。)明白喇嘛？仲有無嘢想講？
亞娣：(左手搔搔後頸，呼一口氣，之後雙手按住大腿，縐眉指指後面門口)你哋同佢講吖……
師父：唔係我同佢講，依家我問你……
亞娣：(打斷)你同佢講啊……
師父：依家我問你，你仲有無嘢想講？(亞娣側頭作沉思狀)在壇前，你仲有無嘢想講？如果無嘢講呢，就唔好再上嚟囉噃，等你心(新)抱好好地去學道，好好地去修喇，得唔得？
亞娣：(用力點頭)好！好！
師父：你想唔想早啲投胎做人呀？
亞娣：(嘟嘴縐眉，低下頭)嗚！我……一把年紀呀……投唔投胎都無所謂……
師父：吓！一把年紀投唔投胎都無所謂？以後就喺下界咁呀？
亞娣 (沉默)
師父：咁學佛啦！直情住喺 阿彌陀佛淨土啦，好冇呀？(亞娣繼續沉默) 好冇呀？
亞娣 (沉默)
師父：睇你修唔修到……呢個功德。你專注念 「南無阿彌陀佛」聖號，其他嘢唔好理囉噃，好冇呀？(亞娣微微點頭) 見到……(亞娣突然打噎)見到 佛同菩薩，(亞娣不停指向 壇前，咧口大笑。)你要好有禮貌噃，明唔明白？(亞娣笑着不停點頭)記唔記得呀？
亞娣：(低聲)記得。係。
師父：記得喇嘛，好啦，你起身，三拜，咁你返去囉喎。
亞娣：(顯得有點不捨，突然又笑了一下)好！好！
師父：起身先。(亞娣隨即站起來，打噎)慢慢，三拜，三拜。(亞娣跟 師父指示向壇三拜)嗱，你退後一步先吓，慢慢，係喇。
亞娣不停打噎，雙手摸摸一直緊閉的雙眼，伸了一個懶腰， 師父轉身向壇拜請，此時亞娣雙手高舉再打呵欠，之後突然睜開雙眼，雙手抱着後腦，眼珠左右轉動，努力回想。
師父：好啦，咁你俾啲心機……( 師父轉過身來看到亞娣)亞娣妳自己俾心機……
亞娣：(側身望着窗外)做乜？
師父：係呀，(亞娣望着 師父，眼神顯得很疑惑。)俾啲心機念 「南無阿彌陀佛聖號」，妳學吓誦經，妳先老爺基本上唔會再上嚟㗎喇，(亞娣聽到「先老爺」，先是一驚，面露憂慮、迷惘。)即係唔會再上妳嗰度㗎喇。(善信亞冰在旁說：「頭先啱啱又嚟咗喇……妳快啲洗手先啦。洗手。」)係呀，佢好開心呀，頭先佢上嚟嘅時候。(法錦：「又唔同之前呵……」)因為明白咗，同埋知道，其實等如幫咗佢，個心(新)抱咁樣到一到(壇)幫咗佢，至於其他嗰啲，(法錦拿椅子給 師父)乖喇，真係隨緣喇，一切隨緣。咁呀，二哥你幫佢「封身」。(影音記錄 MOV_2040)
二哥(法尊師兄)壇前望着亞娣，亞娣站直在壇 祖師爺前。
二哥：雙手合十，合埋雙眼，咩都唔好諗。
二哥壇前合十，三拜，然後替亞娣「封身」。歷時約3分鐘。
最後，師父教導亞娣躬身三拜 祖師爺、諸佛菩薩以及在壇前三跪九叩。(影音記錄 MOV_2041)
(完)
3,340 total views, 2 views today