2021年9月26日 （星期日）凌晨00:39
剛剛正在整理資料，突然收到8小時前離世者的訊息。
善靈哭着⋯⋯
二哥着他有話慢慢說。要精簡些， 師父忙了整天，忙了多天，累了⋯⋯
善靈[李某平]哭着⋯⋯
「多謝 師父！感恩 師父！」
「師父，多謝您！感恩您！辛苦晒，師父！」
「師父，原來一生人嘅時間好快過，眨吓眼就過咗。諗返轉頭，自己真係好唔爭氣，浪費晒啲時間，渾渾噩噩幾十年就過咗去。 師父，如果早啲識您就好喇，唔使兜兜轉轉。但係，原來真係有早知無乞兒。唉！而家乜都冇，兩手一擺，咁就玩完。
好多嘢想講，唔知講咩先。感恩 祖師爺！感恩 伏英老師公！感恩 諸佛菩薩！ 二哥教我講嘅，感恩 二哥！
師父， 法玄師父，真係好多謝您！您老人家咁忙，都肯抽時間同我家人親人講嘢，真係好唔話得，真係講千句萬句都表達唔到我多謝 法玄師父嘅心意。 師父，（玄很受感動，眼淚盈住）涼咗呀，要着得夠，要食飯，要休息多啲。 師父您老人家要保重，唔好捱咁多夜呀！」
（你有咩想同家人講？）
[李某平]即時失聲痛哭：「（家人，）我愛你哋，好愛好愛，可惜已經無機會。」
「師父您話得我好啱，我唔識愛（家人），我好後悔，但已經無得番轉頭，我呢（玄淚）一生過得人唔似人，鬼唔似鬼。有時仲好似過街老鼠咁，（玄淚）人見人憎。做人無晒尊嚴。唔知衰⋯⋯」（玄流淚）
「師父啊⋯⋯ 師父！我同 師父無親無故，自己又咁衰，唔值得 師父為我哋咁唔爭氣嘅人⋯⋯唔係人⋯⋯流眼淚。 師父唔好喊，唔好難過，明白 師父覺得我哋可以有好多機會做好，但係無珍惜，而家恨錯難返，死咗先至嚟後悔太遲。係，我認衰，做人嘅時候唔知衰，死不悔改，而家想重新做人，又無咗肉身，見到自己肉身都番唔到入去。眼白白睇住啲人推我個body入殮房，自己咩都做唔到。見到家人冷冰冰，同我副『偈』一樣，無溫度。係嘅，我真係死不足惜，自己攞嚟。」
「師父，我想講，臨死之前，我見到⋯⋯但我係瞇埋眼嘅，半夢半醒定係昏迷之間，我見到好多唔係人嘅人，係，係嗰啲。有啲係有繃帶包住個頭，係意外走嘅（離世），着住病人衫，白色嗰啲，好粗（質地）嗰啲。
我仲見到好多男男女女，走咗（已離世）嗰啲，喺度行嚟行去，都唔知佢哋做乜。
我又見到唔同顏色嘅光，有紅色，有綠色，有紫色，但都唔係鮮色，係暗啞嘅色。有時好近，有時好遠。
我又見到啲醫生同人睇病，但嗰啲都係已經走咗嘅（醫生、病人）。
師父，我而家好好多喇，個人，唔係，係死鬼咗嘅人。 二哥叫我斯文啲，唔好亂嚟，如果唔係就即刻『的』(捉/抓)我走⋯⋯係，知道， 二哥，對唔住，我無心嘅。
師父，又講番我差唔多斷氣嗰陣，好快，多咗好多嗰啲嘢嚟，有啲係嚟睇我點死，話抵我死，唔死都係無X用。我即時嬲到爆，因為唔識佢哋，我死我事，關佢哋咩事。㷫到我死咗都想番生，同佢哋『鍊』過。因為如果死咗就唔夠佢地『鍊』。
唉， 師父，(我)差唔多斷氣嗰時，見番好多friend，呢⋯⋯嗰啲豬朋狗友，佢哋話嚟接我。我梗係死都唔信啦，如果咁friend就唔會『坤我落搭』，唔係教我吸毒就係教我玩嘢。唉，唔講咁多衰嘢俾 師父聽喇，整污糟晒 師父對金耳。
師父，原來死咗唔係一身輕，以前以為係，所以未衰之前，就同自己講，衰咗又點啫，關你哋（衰人）X事咩！對唔住 師父，忍唔到。 師父，原來人死咗會即刻變，變到好寸，因為唔知死，係死咗無得再死。有時又好緊張，唔知嚟緊會點。多謝 師父同我家人講咗要盡力幫我，因為我好需要功德。多謝晒 師父，我都會努力。多謝 師父教我前妻同我講原諒我，今生之後唔好再見，要見就淨土見。呢句 師父只係心裏講，所以我聽到。又因為 師父知道我家人係點。
唉， 師父，我好無用， 師父話得我好啱，我唔識愛（家人），我以前淨係識要人就我，我就無諗過要遷就人。
唉，唔好意思 師父， 師父好攰啦！我想講多少少，我想同屋企人講聲多謝，佢哋話會幫我念經念佛同食齋，多謝佢哋，無嬲我仲肯幫我，多謝 師父同我屋企人講要點做，多謝 師父！我想同屋企人，同埋會為我念經嘅親友講聲多謝晒，唔該晒，大家保重！希望大家真係可以原諒我，同埋忘記我。如果真係要記住我，就記住我啲好㗎啦！我會聽 師父話，俾心機學，要修心、懺悔同加油。希望唔會令 師父失望。多謝 師父！
感恩 祖師爺！
感恩 伏英老師公！
感恩 諸佛菩薩！
感恩 二哥同師父！
對唔住， 師父很累了！請 師父好好休息。
如果有來生，我好想當面叩謝 師父！ 二哥話『返去啦， 師父好攰啦！』
係，多謝 師父！」善靈跪在地上拜謝法玄。
善靈[李某平]很感恩的微笑了！見到[李某平]本來是白白淨淨的，樣子唔錯，都係斯斯文文咁。相信係識咗壞朋友，自己又無定力，所以攪到自己身體咁差。法玄祝善靈[李某平]得 祖師爺、伏英老師公及諸佛菩薩加持，萬緣放下，往生極樂淨土，其合家人平安吉祥！
[李某平]昨午往生，生於1956年，世壽65歲。吸毒20多年，癌症往生。
感恩 祖師爺！
感恩 伏英老師公！
感恩 諸佛菩薩！
感恩 二哥先師！
南無阿彌陀佛
02:15畢
⋯⋯⋯⋯⋯⋯⋯⋯⋯⋯⋯⋯⋯⋯⋯⋯⋯⋯⋯⋯
事緣：
2021年9月25日 晚上9時40分
阿基（化名）找法玄。因為就親友家屬往生之事⋯⋯
[李某平]1956年生，終年65歲，今午4時許往生。
[李某平]，是阿基（化名）的先長輩，離婚後沒再婚，有兒女一雙年約30歲。
今晚， [李某平]前妻蘭詩（化名），多番懇求阿基說想搵師父（法玄），因她的前夫剛剛往生，蘭詩不想前夫死後「孤零零」。
往生者[李某平]吸毒20多年，癌症往生。（兒子說是皮膚癌，前妻說肝癌。）
得到法玄同意，與蘭詩通話，通話期間，阿基把相關內容透過另一部電話轉述給蘭詩。為了便捷，法玄就讓大家同時開啟揚聲器，「直接」通話。
蘭詩禮貌的叫了聲師父，聲音低沉，有點沙啞，很明顯是情緒低落。談了不幾句，法玄隨即「見到」往生者[李某平]，垂頭喪氣的，獨自在一個細小房子內，坐在一張沒有靠背的深色長木椅上，等待「安排」。在黑暗的環境中，[李某平]的神識正正就是蘭詩所擔心的「孤零零」，好無助，好慘情，很沮喪⋯⋯
法玄把以上「所見」告訴蘭詩，再簡說人生無常，生老病死是常態，並反覆說明念佛的好處。直系親屬要幫助往生者超升，重點是掌握最具判斷性的49天，也可以做足100天或以上。
家人、親友誠心誦經、念佛、持素或做任何功德事作迴向，就是說，往生者的福報很不錯了。
開始跟蘭詩講話時，往生者[李某平]沒能「見到」師父，不知有人幫自己。不到兩分鐘，見到二哥先師去見[李某平]。[李某平]見到二哥先師，「有人來看自己」，神識定了些，即時提起精神，坐直了。對比起之前雙手托住額頭，伏在膝上有很大分別。
感應到蘭詩思緒比較亂，勸她日常無需想太多，兄弟姊妹（人際關係）的事，不要太糾結；盡量莫理閒雜事，讓自己的心定下來。鼓勵她藉著這段時間，用心誦經念佛，功德既可如實幫到前夫，助其往生極樂淨土，也可以令自己修靜。
也告訴了蘭詩，雖然她已離婚，前夫也離世，但緣分未了結。勸勉她最好把握這個機會，首7天功德迴向給前夫時，可以向先前夫道謝，說今生多謝有緣曾一起，得到過[他]的愛惜，今生完結，大家都放下，誠意祝願其往生淨土。自己也要誠心學念佛。
並說吸毒的人，沒有在離世前懺悔和修正，沒有正信正念或真功德，未能往生淨土。亡者轉生地獄，根據生前的作為，一般要受寒冰、火柱、熱（沸）湯之刑⋯⋯地獄刑滿，或轉生畜道，或轉生人道。就是轉生人道，也會在世間經歷很多苦難。
如果來生在人道相見，緣分未必盡善。
人離世了，與家人、親友這一生的關係就此完結。想報恩，想表達心意、愛意或敬意，誠心念經念佛做功德迴向往生者生淨土就最為恰當、最是理想。恩情或怨恨太深，執着了，就放不開，放不下。愛與恨的執念會撒下種子，下一生在六道輪迴再遇上，成為不息的循環，愛恨相報。
⋯⋯⋯⋯⋯⋯⋯⋯⋯⋯⋯⋯⋯⋯⋯⋯⋯⋯⋯⋯
2021.9.30（星期四）01:42
正在整理這個檔案，很累，停了下來，突然知道有[李某平]訊息，接收到：
「師父，多謝 師父！感恩 師父！
師父，好多謝您！而家除咗屋企人，仲有好多人幫我念經念佛。多謝 法玄師父！
師父，我想講，我而家有幾辛苦，好似仲係做緊人咁嘅感覺，呼吸好辛苦。精神上係放開咗，睇開咗，多謝 師父！
二哥（先）師父話係咁㗎啦（吸毒副『偈』壞咗），過幾日會好啲。 二哥（先）師父仲教我點樣呼吸，又教我學放下，仲同我講『body（二哥師父講軀體嘅）都無咗，唔好諗住做人嘅嘢，要接受自己已經離開咗人世，明白咗，而家只得神識，專心跟住家人念經念佛，誠心求生淨土啦，唔好諗咁多喇！講完多謝 師父就跟我走， 師父要休息喇！』
師父，我會俾心機學，唔會辜負家人同 師父嘅期望。」
[李某平]隨即合十，高舉雙手放額頭上，做了一個很有誠意的道謝動作。
[李某平]：「 師父，請保重，南無阿彌陀佛。保重！」然後低下頭微彎着腰，一步一步後退，十步左右，轉身跟住二哥先師離去。穿着白色亡靈服，手腳扣上了粗又重的鎖鏈，但見他神識狀態還算不錯，腰背也挺直了。
南無阿彌陀佛
感恩 祖師爺！
感恩 伏英老師公！
感恩 諸佛菩薩！
感恩一眾有緣！
願善靈[李某平]往生淨土
其家人親友合家平安吉祥
南無阿彌陀佛
延伸閱讀
952 total views, 2 views today