2022年3月18日 晚上23時43分
剛才重閱 《晴明錄》日後有緣會與家人再見，[德]所說的話後。
在整理資料中，又再收到[德]連線。
[德]：「嘩， 師父，以前，一直都知道 師父好忙，好忙！而家走咗喇， 二哥時不時帶我嚟觀景台，俾我睇下家人，又俾我執望仙鏡見下 師父。唔睇由自可（還好），一睇，自己即刻覺得自己好樣衰。
點解會咁講（話我自己樣衰）呢？係因為 師父無數次提醒我，鼓勵我：要俾心機誦經，唔好口噏噏念下幾句佛號，就覺得自己好叻，好巴閉。
對唔住， 師父！Sorry 喇大家！上面嗰幾句係我講嘅，意思，內容，係真係 師父講嘅，但係 師父個人好斯文，識咗幾十年，從未聽過 師父講俗語，即係話， 師父只會簡單直接咁講：「阿德，俾心機誦經喇，唔好懶呀！我哋無資格懶㗎！每日抽少少時間出嚟，（誦經念佛）做下功課，真係好好㗎！開始誦經之後，你就會慢慢體會到箇中好處㗎喇！
對唔住 師父，又阻（住）你，但係我仲有好多嘢想講。唔該晒 師父！
（唔該晒，阿[德]！）
（[德]招牌笑容）嘻嘻，講呢啲！
係， 師父！頭先想同 師父講，原來，人死咗之後，有好多好處，有好多着數。（[德]再現招牌笑容，比之前的笑容更燦爛，看得出是別有用意。）
係咁嘅， 師父！死咗之後（[德]又笑，笑到面都紅了！）好多人對我好好，家人就肯定㗎啦！仲有，識同唔識嘅人都對我好好，又同我洗身，着衫同化妝。真係好正，郁都唔使郁，成個大爺咁！真係好正！（[德]又笑到面紅紅）仲有啊，師父，買嘢（家人幫我辦帛事）又有折頭，真係好正！做人時都無咁多優惠。（[德]笑到差啲流口水！）
師父！好多嘢想同 師父講，（但） 二哥叫我快啲，唔好講咁耐， 師父好攰喇！我哋唔好阻 師父休息， 師父真係好忙㗎！（[德]合十：多謝 二哥！）
師父， 師父您老人家知㗎，仲知道咗好耐㖭，不過從來都無同我講過，係我走咗之後，知道咗，又知道 師父一早就知，我嘅前生。
我嘅前生，係日本人， 蘿蔔頭。（[德]笑臉完全不見了，頓時嚴肅起來！）
難怪，我咁鍾意日本，日本好多地方我（未死嘅時候）都去過。最遺憾係無同 師父去過，無同 然哥去過。
係， 師父，有一生，我哋係相識嘅，係好朋友，所以我哋今生相遇，好投緣。
雖然，（今生）我哋唔係成日見，但每次見面，講咩話題都得。當然， 師父唔會唔記得，我最鍾意八卦您法門做過嘅Case，我真係好有興趣聽，好好奇，究竟， 師父點樣做嘢㗎呢？我真係好想知，但唔好意思問。所以，有時只係傾偈式講下問下，想套下料。 師父好好，會講俾我聽一啲特別嘅個案，但唔會透露其他。就好似𡃁妹（阿詩）單嘢，師父由始至終都無話（俾）我哋聽𡃁妹咩事，點解成日「領」嘢（被靈體滋擾）。
師父，其實我好尊重您。 師父，真係好多謝您， 二哥話（係）感恩！您幫咗我，點醒我，我臨尾幾個月，時時都會想起 師父同我講過嘅說話。 師父話過：「阿德，做人唔好咁執着，愛嘅方法唔啱，就係執着。執着帶嚟嘅只有痛苦。人嘅命數係天定嘅，天定即係因果，即係自己種落嘅！最記得我同 師父講咗我有病， 師父就好緊張，即刻要見我。 師父，我知㗎， 師父咁忙，行咁遠嚟我舖頭，唔通真係嚟剪髮咩！都係嚟睇我死得未。對唔住，我講嘢係咁嘅， 師父係好關心我，好擔心我，想親自見下我，教我念佛求生淨土。
師父，多謝您！感恩您！您老人家好偉大，我好有福，可以（今生）認識 師父！」
師父，講番，我哋以前（前生）已經相識，師父（都知㗎）嗰生係女生，就係喺清水寺附近住，詳情， 師父都知道一清二楚，而且 師父都唔想，起碼係到而家都唔想其他人知（咁多），我就唔講喇！
師父，您啲弟子都幾乖喎，個個都好尊重您老人家，特別係需要您嘅時候（一笑）。師父，點解您咁夜都唔瞓嘅？以前聽 師父講過，話自己好夜瞓，同一般修行人唔同。我聽到嘅時候，聽過就算，無諗過點解，都無諗過要關心。而家，近距離睇到，終於明白。但只能明白一啲，一啲啲，唔多。
師父，原來，您真係咁忙，咩都關您事，死人又關您事，冧樓又關您事，生仔又關您事，生唔到仔又關您事，屙屎又關您事，屙唔到屎又關您事，食飯又關您事，唔食飯又關您事，幾時結婚又關您事，幾點出門又關您事，唔好結婚又關您事，唔好離婚又關您事，點樣同老爺奶奶生活又關您事，點樣教仔教女又關您事，暈咗又關您事，醒咗又關您事，唔醒又關您事，（玄鼻水）瞓唔着又關您事，（玄眼水）點樣做人又關您事，唔想做人又關你事，一句講晒，乜都關你事。戒毒又關您事，還錢又關您事，唉唔講啦，啲友仔，條氣唔順又關您事，有咩都搵 師父，有邊個食緊飯嘅時候，會諗， 師父食咗飯未呢？ 師父今晚食咗咩（餸）呢？ 師父攰唔攰呢？
真係好笑，啲友仔，一個二個 師父前， 師父後，有事 林法玄，無事係咁先。對唔住， 師父，我唔想得失人，更加唔係唔尊重 師父！係（你哋） 祖師爺俾（叫）我講嘅，因為 師父好慈悲，唔會講出嚟。 師父⋯⋯ 師父，唉！
我呢幾日有好大感受，除咗享受好多未死前（做人）享受唔到嘅待遇，仲見到好多生前見唔到嘅嘴臉。哈哈，真係精彩過睇戲，好正！真係好正！
以前（在生時）稱兄道弟， 搭晒膊頭嗰啲friend，原來當我笑話，有啲仲離譜，喺靈堂上講三講四，以為我死咗成碌杉咁（木頭），我聽到火滾，兜嘢拍落佢個頭度，條友仔，無人叫佢嚟㗎，唔嚟就唔好嚟啦，講咁多嘢，阿吱阿咗（咿咿哦哦），咁多人咩佢唔去咩。 師父真係慈悲，唔想我扣分，明明我講「死」， 師父打「咩」字。 師父，我只係實話實說，知道可能係犯規，但忍唔到，就係 師父成日講嘅「習性難改」。對唔住， 師父！
師父，多謝您，感恩您！（ 二哥叫我快啲唔好講咁耐）祝 師父同 然哥幸福平安！祝 師父您老人家晚年幸福健康（知道當然會，但我唔知講咩好）！
師父唔好咁夜喇，辛苦晒 師父！感恩 師父！ 二哥同我走喇（帶我番去）！ 師父早啲休息！
多謝 師父！感恩 師父！」
[德]合十90度躬身向法玄拜請，接着伏於地上，行五體投地之禮，然後跟隨二哥離開。
01:42錄畢
延伸閱讀：《晴明錄》日後有緣會與家人再見
694 total views, 1 views today