2021年11月23日 凌晨1時28分
「我係許某。」
法玄「見到」[許某]處身於環境很黑、很深的地域中；是，地獄。
當下所見，[許某]全身都有蟲在遊走。黑色不知名的蟲，形狀有點似甲蟲，如曱甴般大小，看上去生命力很強。外殼有金屬的質感，似是穿上盔甲一樣的蟲，行動非常敏捷。
身上有「甲蟲」走動，卻又看不出[許某]有被蟲咬過而有任何不適；其神態自若，原來是因為⋯⋯
「係，就喺地獄。因為自己唔爭氣，後生時候高大靚仔，又識搵錢。但使錢仲叻。都未算，係識咗班豬朋狗友，學人食粉（吸毒）。越食越多， 越踩越深，搵到（錢）都唔夠『食』（吸毒）。
我好多謝你，真係多謝你！
唉！今次嚟（見你），係想奉勸世人，唔好掂毒品。諗都唔好諗，唔好試，真係死人㗎！死就好簡單，但吸毒嘅人，死嘅時候好辛苦，死咗之後好慘。形容唔到有幾慘。
我死嘅時候，係死之前，覺得周身有蟻咬咁， 又痕又癢，好難抵（受）。差唔多斷氣嗰時，喉嚨好似收到好窄好窄咁；呼吸前所未有咁辛苦。
唉，後悔太遲！
多謝你（曾經）教我念佛！有，我有念過，不過唔係成日念，時時都唔記得念。到死嗰時，係，就係咁，淨係掛住辛苦，掛住係死就快啲，唔使等，快啲死就算數，唔好獻世。都係好嘅唔靈醜嘅靈，話死就死，無得往生。
好後悔無記住你教我保持念佛；亦都忘記咗，你講過要一心一意求生淨土，要平時好誠心念（佛），要唔好停，要記住。
但死前，（念佛）功夫唔夠，心念唔夠，淨係覺得好辛苦，想快啲死，死咗就算。唉！
原來，唔係咁簡單。我死咗之後，唔使講都知喇，死咗，去咗地獄。
見到閻羅王，我仲傻下傻下咁。以為人都死咗，去報到，報到之後，最多咪好似坐監咁，無咩大不了，係無自由啫，唔使死嘅。因為已經死咗，無得再死多一次。而且，死咗之後，（以為）人無咗知覺，點會辛苦啫，驚都唔驚下。因為（我咁諗）後生吸毒嗰時，癮起無得食咪仲辛苦！唉！
原來，事實唔係咁嘅。係要等。死咗就要等審，審完就去受刑。有受過手腳上又粗又大鎖鏈，然後鎖鏈突然收細（縮），痛到標尿，標眼淚。係做人時未試過咁慘咁痛嘅。
唔想再講，好慘，好慘！
多謝你仲記得我，仲念經俾我，多謝你！
我好想投胎再做人。如果可以，我真係會好好哋，唔會再掂毒品，要做個好人，做義工，要幫人。
多謝你！（而家喺地獄）我好有面。
以前，啲人識我係茂利（傻人咁），自從 （先）法尊師父嚟過，見咗我，我已經即時調到好啲嘅環境，而且暫停受刑。
第二次見到 （先）法尊師父，同我講，可以幫我減輕（地獄嘅）刑罰，但要誠心懺悔，一心一意懺悔；仲要將功贖罪。我當時唔明。 （先）法尊師父就同我講得一清二楚，到我明晒。 （先）法尊師父問我：『係咪真係明？』又問我：『係咪真係需要我哋幫？』我諗都唔諗，係咁點頭。
（先法尊師父）佢又講：『如果你真係要我哋幫，咁你就將自己經歷講出嚟，等啲人知道毒品禍害，又可以知道吸毒嘅人死前同死後會點。如果如實講出嚟，俾有緣人睇到，又能令人知道點樣下決心戒毒，真係幫到人，咁先可以（將功贖罪）幫到自己。』」
[許某]突然喊着跟法玄說：「我真係好後悔，其實好多人勸過我戒，我都試過戒，但係唔成功。當時我仲埋怨細佬妹唔借錢俾我，一啲親情都無，唔係人嚟嘅。但我就無諗過，佢哋鬧我，唔肯借錢俾我，係唔信我，驚我又係攞錢去吸毒。所以，佢哋覺得（我）神憎鬼嫌，只係未攞掘頭掃把拍我。
好彩，最後我都戒咗。但係，戒得太遲。而且，最重要（好可惜）係無的起心肝誠心念佛。如果聽你講，一心一意念佛，誠心求生淨土，我相信，就好似（先）法尊師父所講嘅一樣，一定可以心願得償。就係未得，差啲，都可以好快輪迴，唔使不分日夜，應該係無日夜之分咁喺地獄受刑受苦。南無阿彌陀佛！」
[許某]再說：「我好感恩你哋 祖師爺！多謝 （先）法尊師父，多謝你（同你家人）！好心有好報，祝你哋一家人幸福健康！我仲有好多嘢想講，但怕你辛苦（太晚了要休息），都係唔講喇，多謝晒！好感恩！仲有，你啲徒弟好乖，個個都咁生性，真係唔話得，好難得！
多謝，感恩你哋 祖師爺俾機會我見你，借你金口同大家講我嘅事。希望有緣人都要珍惜。感恩！感恩！感恩！」
[許某]三拜退下
感恩 祖師爺！
感恩 伏英老師公！
感恩 諸佛菩薩！
感恩 二哥先師！
南無阿彌陀佛
祝有緣人
早日戒除惡習
道心佛念堅定
求生淨土如願
02:48 畢
延伸閱讀
832 total views, 1 views today