2022年6月6 日（星期一） 下午3時40分
善靈[江某]：「多謝 師父！
師父咁忙，咁攰，都接收我嘅個案，真係好多謝 師父！
師父，我搵咗 師父好耐喇！係 師父太忙，案件又多，我等到而家先有機會同 師父講嘢。多謝 師父！
師父，嗰生我⋯⋯係， 師父頭先已經見到晒當時（喺酒吧，被一個我無防範嘅女人喺我杯飲品落藥）情況，係，就係咁（離開酒吧之後，因意外無命）。
我嗰生係個生意人，係個好成功，好有能力，好有錢嘅生意人。 師父都見到，係，因為生得高大靚仔，年輕（中年）嘅成功生意人，西裝骨骨，行出嚟，一眼就睇到（我）。
嗰生， 師父頭先睇到我喺酒吧嘅情景，我時時去嘅嗰間酒吧係好高級。 師父見到我着杏色西裝，三件頭，係我最鍾意嘅其中一套，啡色皮鞋立立令，襯到我成個人都好靚（仔）。」
見到[江某]那一生的樣子很好，一個成功人士好強嘅氣場。為人也很隨和友善，並沒有絲毫不可一世的高傲態度。
「師父，我當時已經係有家室嘅人，老婆係個賢內助，係個賢妻良母。我哋（夫妻）有個快三歲嘅女，生得好靚，皮膚白白淨淨似足媽媽，樣就似晒我。個女雖然仲好細，但睇得出好乖，好聽話，真係好識氹人開心。
師父，我好鍾意我老婆，好愛佢。但因為生意多，時時要應酬，難免會遇到職場上嘅女性。
我識佢（化名阿芝嘅前生），都係同生意人應酬嘅時候。佢（阿芝）個樣同今生有啲唔同，但無變嘅係，佢喺適當嘅時候就嬌聲嗲氣， 黐身黐勢。我做生意好耐，知道出嚟搵食嘅女人唔掂得，望都唔好望咁耐，（否則自己）分分鐘失身。
唔知係神推鬼㧬，還是佢（阿芝）有絕世神功，第一次見佢（阿芝），（外表）斯文得嚟（態度）又大大方方，好識交際應酬，笑起嚟都幾好睇，屬於順眼又有少少銷魂嗰種。嗰次見到佢係喺（啤）牌局，佢陪住個老細玩牌，坐到好埋黐住（身）咁，又郁手又瞇眼笑。雖然唔算靚女一名，但都吸引到人嘅注意。
師父，其實，我係一個有定力，好有分寸嘅人。而且，我好愛我老婆。老婆雖然都唔係靚女，但佢好溫柔，好體貼，對我好好，好愛我，好愛家，好愛我嘅家人同長輩。
我平時下班之後，無需要應酬，我就會返屋企，享受家庭樂。工作雖然好忙，好辛苦，但唔辛苦就唔會有世間財。所有風光背後，都係不為人知嘅（付出）。
師父，佢（阿芝）雖然唔係喺風月場所工作，但喺會所「招呼客人」，用心之極；（兩種）職業唔同，（但所做嘅一啲事）性質相近，都係釣唔到金龜，就釣水魚。我都唔知點解，（我自己）聰明一世，定力十足嘅人都會自投羅網。
講真，講樣，（阿芝）真係入唔到我眼。仲有，佢嗰啲搔首弄姿，一睇都係要搵食嘅人，玩都唔會搵佢嚟玩。更何況，講真，我絕對唔係一個（玩弄女性嘅）玩家。
師父⋯⋯」
原本好大方大氣，又神情鎮定嘅[江某]，突然間，哭了！
「師父，真係講唔出點解，自己咁有定力，都可以搞到一塌糊塗⋯⋯
懵下懵下，就同佢（阿芝）相好咗。
相好咗之後，我竟然完全失守，無晒防禦力，完全忘記歡場無真愛，隨時玩出火。
如果話佢（阿芝）手段高，就貶低（我）自己。如果話真情打動咗，咁佢又唔會謀害我。係，佢，係佢害死我嘅。 師父，點解佢要害死我？當然係為咗錢喇。
佢（阿芝）有個相好，係真相好，兩個人夾埋，想攞我命，我仲傻下傻下，以為嗰個跟出跟入，接送佢嘅人都真係佢表哥。
佢（阿芝）同我講，佢細個嗰時，屋企好窮，老竇老母有病，照顧唔到佢（嗰時得幾歲），就住喺「表哥」屋企。（話長大）之後，佢（阿芝）喺省城打工，遇到貴人，一步一步，越做越好（環境）。「表哥」喺鄉下無嘢做，迫於無奈去省城碰運氣，搵到佢，佢就介紹個「表哥」打工。後來，（輾轉到了大城市生活）環境雜，（阿芝話）時時晚出晚歸，所以請返個可靠嘅人，自己人，跟隨自己，保護自己。佢仲話，佢當呢個「表哥」親阿哥咁；（又講）話就話請「表哥」保護自己，其實係互相照顧，當係報答佢屋企曾經照顧過佢。
我雖然係個生意人，會防人（呃自己），但就係竟然會上當。佢（阿芝）講嘅嘢，我照單全收。完全無諗過，嗰個所謂「表哥」，其實係佢嘅男人，一齊「搵食」。當然，我係死咗之後先知。
師父，其實真係一匹布咁長，真係好似電影咁，內容（經歷）真係唔到人唔信，真係好劇情化。
我怨佢（阿芝）。因為佢，我信佢，愛佢，幫佢。點知，喺我最有能力，（家庭）最幸福嘅時後，我原來信錯愛錯人。係，我死咗之後，一直好怨佢。由剛剛開始講我嘅事俾 師父聽嘅時候，都係好怨，好恨佢。但到呢一刻，知道 師父好想幫到我哋，好想我哋放下，唔好因為怨恨而錯過投胎機會。我明嘅，我真係明白咗，（所以）突然之間，放鬆咗，覺得成個「人」輕咗，無晒之前好怨，好恨，好痛苦嘅感覺。多謝 師父！
終於明白點解 師父咁忙又咁攰都仍然會幫人。 師父，我好後悔，後悔自己無定力，一路以為自己有。又後悔（離世之後）無早啲放開。而家（真係明白晒），心突然鬆咗，好舒服，「人」都輕晒，多謝 師父！辛苦晒 師父！
師父，真心多謝您，感恩您！ 二哥（先師）嚟咗接我，我會跟 二哥（先師）去報到，唔會再留喺度追債（報仇），太辛苦喇！多謝 師父同 二哥（先師），希望，將來有緣，我再報答 師父同 二哥（先師）！
師父，我會好好學，會重新「做人」，會帶眼識人，會客觀，唔會再係咁蠢，唔會再自以為是。過去嘅種種，佢（阿芝）有錯，有罪，當然有。但呢一刻，知道 師父嘅心意，明白咗真係放下先會解脫。
呢一刻嘅感覺真係好神奇！
師父，請保重，我相信，將來我哋一定會再見，我期待嗰日，親自禮謝 師父。（你應該誠心禮謝 祖師爺、伏英老師公及諸佛菩薩。）明白，我會誠心禮謝 祖師爺同 佛菩薩，同埋（禮謝） 二哥（先師）。
師父，您一開始睇到嘅，係，就係咁，我就係咁樣走咗（離世）。希望，多啲人珍惜，多啲人知道保護好自己，一步都不能鬆懈。多謝 師父！
感恩好多人！人世間真係有好多好心人，我哋有命，就要好好珍惜，珍惜自己同家人，珍惜自己身邊嘅人。 師父，請保重。祝 師父身體健康，長命百歲！祝 師父心願達成，祝師父徒弟都係健康，平安就好。
師父，多謝 師父點化，我真係明白咗，明白晒。明白 師父想大家好，想大家都有機會改變命運，（呢一刻）我真係原諒咗佢，希望佢跟 師父教嘅『誠心懺悔，努力用功。』」
二哥（先師）神氣充沛，仙氣十足的，向法玄微笑示禮。同時，一個眼神向[江某]示意，是時候離開。
「我跟 二哥走喇，多謝 師父！」
[江某]很有禮的拜謝，後退幾步，然後轉身跟 二哥先師離開。
18:20 畢
[江某]於上海。1923年遇害，時年35歲。
註釋：
神推鬼㧬：形容好像有神鬼驅使，不能自控地做出一些從來沒想過要做的事情。
《說文》：㧬，擁也。
《廣東俗語考》﹕㧬，音甕上聲。以手推門曰㧬。
808 total views, 1 views today