2022年10月1日 16:50
女善靈：「我搵咗 師父您好耐喇！ 師父您最近好嗎？仲喺閉緊關？辛苦晒 師父，唔該晒 師父！
師父，無變，都係咁嘅樣，係老咗少少，但一切都無變。當然，法高咗好多！
師父，我搵您，係想 師父救我。我避無可避搵咗個人做避難所，暫時避下風頭。
師父，話說當年，您幫咗我，救咗個善信，放過我，無打散我，要我踏實修善，等機會輪迴，可以重新做人。我當時面對 師父都有機會逃出生天，一方面驚到要死，只係死到無得再死，一方面淨係諗住有得走快啲走，無⋯⋯係唔識⋯⋯多謝 師父放生之恩。所以，而家嚟多謝 師父！
可惜我死性不改，走甩咗之後，無乖乖列隊。唔識珍惜 師父俾嘅機會，偷走之後，繼續喺陽間飄移，四圍去玩，四處惹事生非。終於，喺蘭桂坊遇到魔道高手，佢有殺錯無放過，吸咗好多鬼靈精怪。我驚得要死，盲舂舂撞咗入去嗰個女人度，個女人(飲到)醉昏昏(仲)跟咗個人去開房。
我太耐無嗰種生活，嗰晚（上咗個女人身），發生咗。我當時感到好high，好開心，講唔出有幾開心⋯⋯真衰，真唔知醜，講俾師父聽，係因為要如實向 師父禀報，希望得到原諒（曾經做過嘅錯事），可以有機會逃出生天。（講呢啲內容）並非要對 師父無禮，對唔住， 師父，感恩 師父！
之後，太沉迷嗰種生活、嗰種感覺、嗰種（男女之間）好high嘅感覺，終於，不能自拔。(到)有日，覺得好悶，開始厭煩嗰啲俾人……俾男人玩嘅感覺，好想走（離開嗰個女人身體），但出唔番去，試咗好多次都唔得⋯⋯其實初期，我經常自出自入，鍾意就喺外面玩下，鍾意就入下其他（女）人身體，但唔係次次成功。如果成功入咗去，我會玩下（幾日），鍾意幾時走就走，好簡單。
嗰個，第一個宿主，蘭桂坊嗰個，我留得最耐。但後來，我唔鍾意留低，想走，有時走到，出咗去，搵唔到暫時宿主，又或其他宿主太爛太臭，我都會走番轉頭，搵番佢（第一個宿主）。久而久之，又接受咗，習慣咗。之後，又煩又悶，決心離開。點知，走極都走唔到。唔知點解。
跟住，唔關我事，唔係我攪佢（第一個宿主）嘅。佢開始無厘精神，成個廢人咁，真係冇癮。對唔住， 師父，我無心咁無禮，請 師父原諒！
知道 師父好用神，好對唔住。多謝 師父慈悲，多謝 師父，感恩 師父！
師父請保重金軀！
師父，如果可以，我真係好想跟住 師父學道。不過，我知道自己無資格，配唔上做 師父徒弟。如果大卸天下（亡靈），我可以列隊等輪迴，好希望嚟得切長大，可以認識 師父，可以跟 師父學道，可以當面叩謝 師父。 師父，多謝 師父，感恩 師父， 師父請保重！
師父，我淨係記得自己叫阿卿，姓咩，唔記得，好似姓吳，又好似姓張，又好似⋯⋯
算啦，人死咗，四處飄盪，姓咩都無用， 算吧啦！
但我記得 師父同我講過，要珍惜機會，好好修行積德，唔好任性妄為。我記住，一定唔會忘記，曾經唔聽 師父講，所以錯失做人機會，而且仲犯下攪人攪事嘅大錯。（鞠躬）對唔住 師父！
師父請保重，後會有期，南無阿彌陀佛！
17:49畢
延伸閱讀：法玄師父《相遇非偶然》 後續補充《晴明錄》陽間飄移
632 total views, 1 views today