2022年10月31日 17:53
一名往生者合十：「 師父！」
淚流滿面的善靈，哭着⋯⋯
呼吸很困難的感覺仍然存在。
「師父，我讀書唔叻，成日掛住玩。而家先真真正正明白樂極生悲嘅意思。可惜，太遲！
師父，人間地獄真係好恐怖！一生就咁過咗，講咩都無用。
師父，原來念頭可以無國界，係真嘅。我差不多要斷氣嘅時候，念頭裏面就係諗，如果而家有人嚟救我就好喇！如果有神仙，救我一命，我願意做咩都得，真嘅！
可惜，一秒之間嘅事，生死之間，神仙都救唔到。因為人疊人，誇張啲講句，要用機器先可以拉到個人出嚟。太遲嘅醒覺真係於事無補，就係咁，我就魂斷梨泰院。
好多人都覺得我哋無辜，其實係咪真係無辜呢？當然，睇番當時發生嘅事，係，係無辜嘅。但，一切都有前因後果。
前世因，今生果。我前生係做妓女嘅，係一個吸毒嘅妓女，死嘅時候18歲。嗰生，我好細個就俾人攪咗，12歲？8歲？唔記得。淨係記得攪我嗰個係家人嚟嘅。到我懂事，我已經好有經驗，性。
我好怨，好恨，終於，15歲就跟咗人走路。以為同村嗰個人可憐我，要保護我，唯一辦法係帶我走，帶我有咁遠走咁遠，咁先至唔會俾嗰啲（衰衰嘅家）人揾番我。
離開咗之後，我成個人唔同咗，好似輕鬆咗、開心咗少少。 師父啊！（善靈哭着，法玄的淚水也忍不住了！）
師父，點解我唔可以早啲識您呢？點解我咁無福氣呢？我⋯⋯真係罪孽深重啊！
師父，嗰個同村人帶我去到好遠，有一間好簡陋嘅茅屋，話係遠房親戚荒廢嘅，可以暫住。又同我講，男女授受不親，佢唔方便一齊，叫我樣樣小心啲，暫時住住先。仲話聽日帶啲嘢食同用品俾我，之後嘅事再安排。
當時其實已經天黑，我都有啲驚，不過唔敢再麻煩人，所以無講，無求佢留低陪我。
天下烏鴉一樣黑。男人都係無個好人，表面上可憐我成日俾屋企人打，食又食唔飽。又知道我屋企人多手多腳，但我無講到被家人攪咗。佢估唔估到我當時唔知。
就喺嗰晚，好夜，其實我未瞓，因為黑鼆鼆(粵音蚊蚊)真係好驚，加埋啲風聲好恐怖，所以唔敢瞓。嗰個（同村）人嚟咗，話驚我肚餓，所以帶咗啲饅頭同乾糧過嚟，仲帶埋幾支蠟燭仔。佢好好人咁，幫我點着支蠟燭，叫我食啲嘢先。
其實佢嚟嘅時候，我都俾佢嚇餐死。屋外突然有聲，然後有人敲兩下門，就想推門入嚟。我唔敢出聲，佢細細聲叫我個名，又講埋自己係邊個，我先鬆一口氣，開門俾佢。
佢好似好親切咁，遞咗個饅頭俾我，叫我快啲食，唔好餓親。話都無咁快，食咗兩個饅頭。佢突然指住一個角落叫「有老鼠呀」，即刻攬住我。我驚到推開呢個叔叔。佢話，唔驚唔驚，有我喺度。
我用力想推開佢，越用力佢就更大力攬住我。大我十幾年，真係就嚟做得我老豆咁滯。佢話，唔驚，有哥哥保護你，你唔使驚⋯⋯
我，我唔想再講，都知我……結果無好事！
就係咁，我就同呢個人一齊，受佢所謂嘅保護。無幾耐，一年都唔夠，佢賣咗我去一間妓寨，我就喺嗰度開始咗賣淫生涯，仲學埋吸毒。
點解我唔走？走去邊呀？家，唔番得，番去都係死路一條。去得邊？嗰個年代，女人無地位，無能力，都係被歧視嘅一群。
做咗妓女，衰嘢學得一籮籮，心裏極度怨恨男人，遇到對我好嘅客人，我都好有手段，氹到佢哋陀陀擰，連屋企同老婆都唔記得。我仲叻到扮到自己好無知，好柔弱咁。事實，未做妓女之前，講真，我確實係個好怕事嘅人，所以，喺屋企，受咗好大侮辱同委屈，我都粒聲唔出，死死地氣咁留喺嗰度，因為知道插翼難飛。
有同村人帶我走，以為可以逃出生天，點知，都係死路一條。
氹得啲客好開心，媽媽對我都好好，但係啲所謂姊妹對我就係充滿敵意。最恐怖嘅係好憎我嘅姊妹，表面好似好好咁，同我傾心事，教我招呼客人揾多啲（錢），跟住，仲好到話食嗰啲（毒品）可以忘憂，咁樣就可以忘記以前（我無講）嘅唔開心或者痛苦嘅事。我真係傻下傻下咁，信嗰啲係姊妹，信襯後生（呃啲客人）揾多啲錢，將來可以過幸福生活。
真係好似電影咁，快活過神仙，都只係表面，因果確然存在。
今生，自問我無殺人放火，無姦淫擄掠，無偷呃拐騙。當然，都無做過咩好（慈善）事，淨係吃喝玩樂，年輕嘛，恃住。
師父，唔想講喇！ 師父都好攰，唔好意思，辛苦晒， 師父！
仲想講少少，有啲人覺得我哋抵死，無嘢好做咩，走去咁多人嘅地方玩。 師父，唔係咁嘅，原來，要經歷嘅，點都要經歷，要死嘅，真係無得留低。當然，我哋係死得好寃嘅，覺得。但各人有各人因果，死嘅唔眼閉，但都死咗。現場睇住我哋死嘅人，都唔會好得去邊，一生難忘。
所以，因果又好，意外無辜又好，希望睇到新聞或相關消息嘅人，唔好俾咁多意見，口多積孽，無謂呀！
師父，我覺得舒服晒，輕鬆咗！多謝 師父俾機會聽我講。
我係韓國人，女，未婚，獨居。前生係中國農村人。希望，大家都為我哋呢班無主（寃死）孤魂祈禱、念經，超度我哋。功德無量。」
善靈合十感恩！
19:34 畢
629 total views, 2 views today