2022年7月22日 22:30
「師父，因為好驚，瞓唔到，攪到精神恍惚，無返工，無返學。係，半工讀。之後，成日喺屋企。半年，仲未放低，有時諗吓諗吓就驚到喊，匿埋喊，喊完又唔食，又唔瞓，好快瘦到皮包骨。俾阿媽鬧我無鬼用，死咗條女啫，又唔係死咗老豆，使唔使咁長情呀！
係因為老母唔知道咁大鑊。我無講，講出嚟都無X用。對唔住！講咗粗口，對唔住， 師父！
之後，老母四圍去問人，（問）我係唔係領咗嘢？有條道士，對唔住，係有個道士，話我中咗嘢，唔攪（番掂）好大鑊。
老母乜都唔信，信無錢萬萬不能。老母見我真係問乜都唔睬，唔食唔瞓，驚我撞鬼，驚條女纏住我，老母就叫個道士幫我驅鬼。
我跟老母上去道堂，舊唐樓頂層，有幾個老道喺度，着住白色底衫，大肚腩。我都係俾老母迫我去，話係咪想死得早過佢，正衰仔⋯⋯
上到去，冇耐（不久），道士，着住灰色道服，上香，鈴一輪，跳一輪。我都唔知攪乜，不過，之後，我個心真係定咗啲，開始食到吓，瞓到吓。
師父，件事就係咁過咗去，以為。
過咗幾年，係好多年，我識咗個女仔。係之前一直有陰影，唔敢拍拖，唔敢識女仔。但遇到呢個，唔知點解，就乜都唔記得晒，忘記晒之前發生過嘅事。
一眼就鍾意咗呢個女仔。佢好靚，好斯文，係同一班朋友食飯，佢都喺度，介紹咗，識咗。識咗幾個月，有次，喺間鋪頭仔食雲吞麵，佢認得我，同我打招呼。
又隔咗好耐（一段時間），幾個月，又喺一班朋友食飯，呢個女仔又喺度。今次見到面，大家熟落咗，交換埋電話，又話得閒一齊食飯。
就係咁，我哋見過幾次，感情開始發展。嗰時，我做裝修，係裝修佬。但我外型唔差，又鍾意扮靚，所以望落去，都幾睇得吓。
開始咗呢段感情，乜嘢都唔記得晒。就喺我哋開始想傾結婚嘅時候，我呢個未同我（註冊）結婚嘅老婆，突然間病咗。唔食得，唔瞓得。成日發噩夢，話有個女人同佢講，叫佢俾番個老公佢。
初初個老婆淨係同我講話發噩夢，之後，有一晚，瞓瞓下覺，老婆大聲叫，仲踢手踢腳嘈醒我，我問老婆咩事，喺咪又發夢。老婆同我講，話有個着住一套紅色衫裙，好似拖住個細路，頭髮好長，突然飄過嚟，喺馬路，夜晚，經過一部的士，飄過嚟，捉住我老婆隻手，好惡咁叫我老婆放手。
老婆嚇醒咗，係咁喊。我話發夢啫，我喺度，唔使驚。仲同老婆講，叫佢要搵就搵我。其實我心知肚明。初初老婆講話（夢中）有個女仔細細粒，幾靚女，後來突然變成惡樣，飄過嚟，都無講話拖住個細路。之後再講，話好似拖住個細路嗰時，我好似突然俾人拍咗後尾枕（後腦）咁，即時諗到可能係佢，應該係佢。即刻打咗個冷震。
師父，對唔住，辛苦晒。（因為成個月都忙，對眼得一條線。）
師父，之後，老婆好驚，唔敢瞓，驚一瞓就又發噩夢。我聽得幾聽，開始好嬲，同嗰個死咗嘅講：『有本事你就嚟搵我，唔好攪佢，佢係我一生最愛。』
講完冇耐(不久)，我就病咗，終於一命嗚呼。
師父呀！你幫下我啦，我知 師父好攰，對唔住， 師父！
冤冤相報何時了，原來係真嘅。
對唔住 師父（太累，眼都幾乎打不開），辛苦晒 師父！多謝 師父！
（你講嘅說話有啟發性，等有緣人聽下。）
係，希望情侶之間要互相信任，要好好珍惜，互相愛護。合則來，不合也要好好分手，唔好攪出人命。如果唔係真心相愛，唔好咁隨便。
多謝 師父！感恩 師父！ 二哥嚟接我啦，多謝 二哥菩薩！
感恩 祖師爺！
感恩 二哥！
感恩 菩薩！」
［一丁］合十拜退
跟着 二哥先師離開
00:04 畢
感恩 祖師爺！
感恩 伏英老師公！
感恩 諸佛菩薩！
感恩 二哥先師！
729 total views, 1 views today