2022年11月7日 21:59
「師父！晚上好！
師父，點解（唔明） 師父肯幫我哋？唔明，係見到我哋好可憐？係點解？
正如 師父頭先寫嘅：『好多人都有問題(想問)，但未必有答案。』
師父，喺街流離浪（粵音朗）盪，唔係我想嘅。無辦法，係自己唔爭氣，死都唔服，死唔眼閉，死淨把口。但日月過去，見唔到光，見唔到希望，漸漸絕望，就好似喺無底深潭咁，永無出離嘅一日。真係好慘！
師父，好奇怪，人死咗之後，無牽無掛，其實應該係好幸福，就係 （法玄）師父講嘅，啲（出家）師父都係咁講嘅，經文講嘅『無罣礙』。但原來唔係咁嘅。『無罣礙』同(因)無人無物，想掛無得掛所以講到唔使掛，係兩回事。
師父，好得意，（死咗之後）有時覺得好自由，有時又覺得點解自己咁慘？但戇居居咁，永遠搵唔到答案。又或者，好彩無答案。如果，假如，我係話，如果，知道（記起）自己十惡不赦，仲會開心咩？仲會覺得好自由咩？唔係嘅！起碼我自己就唔係咁諗。
時間過咗幾耐（多久）我唔知，淨係知道就係咁，（死咗之後）日日都係咁過。有時會突然諗番起未死之前嘅生活片段，會好驚，乜原來我以前係咁㗎！又會覺得，真係好衰，自己攞嚟衰，有嘅時候唔珍惜，無咗得個恨字。
師父，我以前（生前）做打鐵嘅，係個打鐵佬。由朝做到晚，一年365日無時停。唔好講家庭溫暖，講誇張啲都做到有家歸不得。因為忙起上嚟真係無時停。
師父，打鐵真係好辛苦，子承父業，我無得揀。我兄弟姊妹多，自己又讀唔到書，好細個就要出老豆舖頭幫手，仲成日俾老豆鬧我死蠢，食塞米，唔爭氣。就係俾老豆鬧得多，（所以）我同老豆完全無感情。係自細食佢嘅飯，自己又唔爭氣，又無膽離家出走，跟住個老豆，做吓做吓，就無諗過轉行。
之後，結埋婚，生埋幾個仔女，無得飛（唯有接受現實）。係嘅，做人應該要實際啲嘅。我生咗兩個仔一個女，個女似我，讀書唔成，（個女）好細個就俾人攪大咗個肚。好彩個衰仔認數，兩個人就好早生仔。嗰條友仔做工廠嘅，人係蠢蠢哋，都好，夠老實。係滾我個女嘅時候唔老實，所以攪大咗（個肚）。
多謝 二哥，俾我睇番以前自己做過嘅嘢，所以講到啲俾 師父聽！
二哥叫我長話短說，講重點。係嘅，多謝 二哥！感恩（二哥）⋯⋯係，應該先感恩 祖師爺！感恩 伏英老師公同 菩薩！感恩 師父！感恩 二哥菩薩！」
（二哥微笑：「咁識賣口乖，個個都係咁。啱嘅，要識感恩，要有禮貌！」）
「師父，重點係，原來人死咗之後，就算（家中安）有祖先（位），（往生者）自己心不在，或者心有不甘，都係會四圍去， 唔黐家嘅。最衰就係出咗去，覺得好自由，好瀟灑，就會唔記得咗屋企，慢慢就會覺得自己好淒涼。到想返屋企（祖先位），又覺得唔慣，行來行去，地方細細。有時睇到屋企人做埋啲衰嘢，自己又眼火爆，想冚佢哋一巴。不過，知道得個想字，做唔到嘅，慢慢就覺得唔好嘥氣。
仲有， 師父，我想講，屋企人無宗教信仰，自己死前又係信錢唔信人，咩都唔信，到死咗喇，知道咩都無，渣都無；唔係，係得番啲骨灰。屋企人領到我啲骨灰，新鮮熱辣，仲會有啲感受、有啲眼淚。攤凍咗之後，骨灰即係垃圾，劈埋一邊。
唉！人死如燈滅？唔知，唔識講。
多謝 師父！知道 師父好用神，都聽我講，俾機會我講，我真心講句多謝！好多謝！好感恩！
師父啊！係呀， 師父成日講好可惜太少人知道（因果同輪迴真道理）。但 師父，我哋好好彩，有 祖師爺同 菩薩放行，俾我哋同 師父講嘢，俾多啲人知道，又俾下界知道，有機緣就要好好把握住，機會過咗就無。
多謝 菩薩俾我哋嚟領功德，感恩 祖師爺！感恩 佛菩薩！
祝 師父身體健康！
祝 師伯（師叔）身體健康！
祝師兄弟身體健康！
師父，我當咗你係我 師父㗎喇！你收唔收我呢個徒弟都無關係，我認定咗你係我 師父，我哋打鐵佬，鐵咗心就唔會變，將來，我知道，一定會見番 師父，向師父斟茶遞水，叩頭俾 師父。 師父請保重！
我哋幾個走先喇！
多謝 師父！
南無阿彌陀佛
係 師父，我叫做［亞左］，多謝 師父！」
［亞左］合十準備退出去時，遠遠站在後面的，有很多善靈，看不清多少位，能看到的，最少十多二十位。其所處環境很黑、很深而遠的，漸漸有些善靈散去，餘下十位八位。最後，跟住［亞左］一起領功德然後離去「報到」的，看清楚些，再數一數，是八位。
南無阿彌陀佛
23:09畢
604 total views, 1 views today