「阿彌陀佛呢四個字，呢個佛名號，係有無量光無量壽嘅意思。人，係需要有陽光，個人先會精神，花草樹木，有陽光，先會生長得靚；我哋恭喜老人家，多福多壽，長命百歲，所以呢句佛號其實有呢個含意喺度。無量光，即係好光好光，無量壽，即係話當我咃在世嘅時候，得到 諸佛菩薩嘅加持；與此同時，最重要嘅係，有呢個緣分學佛，念佛號，心念係希望去 阿彌陀佛淨土嘅話，我話你聽，因為你乖，你有做功課，同埋你有改善自己，修正自己，係肯定做得好好嘅話，西方三聖，阿彌陀佛，觀音菩薩，仲有大勢至菩薩，就會親自嚟帶我哋返上去……
所以而家平時要管好自己，唔係响師父面前先至立正，你喺師父面前立正，我最多一日見你五分鐘，或者食餐飯，一個鐘、兩個鐘、三個鐘？重要係自己管好自己，念佛，每日就係念佛。念佛嘅方便就係，平時喺咩情況之下都可以念，你响心裏面念，唔念出聲，你打扮到好靚，人哋唔知你，原來你已經修緊㗎喇。
你為你自己去修，『南無阿彌陀佛』，甚至你係可以每日定一個時間，如果屋企有菩薩位就菩薩位，無菩薩位就當天，可以將呢句佛號，迴向俾屋企人或者父母，身體健康，可以稟嘅，但係，一段時間之後，要無念無求，咁樣念呢句佛號，就最殊勝！唔使開聲，諸佛菩薩一樣知你要啲咩。
但係，有可能我哋都會遇到考驗嘅，『哎吔，我平時行路好小心嗰喎，今日都好小心，點解我會棘腳嘅？棘腳都不特只，仲趺咗喺度！』我話俾你聽，歡喜心，輕受，輕輕受咗喇。所以平時念佛好重要，會有一道光包住我哋，我哋自己睇唔到，修行人睇到，上天下地睇到，虛空界會睇到……總之，喺心裏面念佛，『南無阿彌陀佛』，平時出入啲咩地方都可以念，自己做自己嘅功課，係會受到加持。」
弟子筆錄326A095 2023.05.06 14:03
637 total views, 1 views today