2023年6月3日 12:30
「師父，您好！係，我係中鋒，終於等到呢個機會，見到 師父，同 師父講嘢。
但係，都覺得唔係好啱嘅時候。知道 師父太忙，病咗。
但，咁難得嘅機會，等咗咁耐，唔想放棄。怕過咗，唔知要再等幾耐（多久），唔知有冇第二次嘅機會。辛苦晒喇， 師父！
師父，我同（老友）佢識咗好耐，無話不談，仲講過將來要共患難。可惜，估唔到，自己話走就走。係粒聲都冇，話走就走，要老友同（我）家人傷心難過，真係好對唔住佢哋。
師父啊！首先，我想藉住 師父俾嘅機會，同我家人講聲：『對唔住，養到我咁大，我都未報答，粒聲唔出就走咗，真係無良心！但係，唔係咁嘅，唔係我想嘅，我都好難過。但咁又點呢？我都好無奈！』
仲有：『當日同我一齊玩嘅波友，要大家擔心好耐，好過意唔去，對唔住！』
（嗰個）老死，就唔使講喇，喊到豬頭咁，又唔食，又唔瞓，又怪自己點解睇唔出。『傻啦，呢啲嘢有預先知道嘅咩？』
不過， 師父，我除咗想多謝家人同老友，主要想同 師父講當日發生事嘅過程。
其實，早一晚，我個心都覺得囉囉攣，有一種好不安嘅感覺，好難形容係點樣。係一種好唔自在，好唔踏實，好⋯⋯同平時好唔同。覺得，有啲嘢想同屋企人講，但其實當時無咩特別嘢想講。而家諗返轉頭，原來，（死前）係有先兆。
離開（人世）前一晚，同（出事）當日，見到嘅景象係好唔同，話唔同又唔係，話同平時一樣又唔係，總之，就係講唔出點樣。
突然間暈嗰一下，前10秒，大約。眼前一黑，咩都睇唔到，叫都叫唔出聲，腦裏面咩都無，連驚都唔識，一啲反應都做唔到。而家諗返轉頭真係好恐怖，一生就咁玩完，毫無先兆。
師父啊，我覺得你好偉大！我等咗你好耐，初初係好心急，甚至有少少嬲嬲哋，點解 師父（知我等緊）唔俾我講先。後來，知道 師父真係好多個案要做，不眠不休，做到病埋，都要再做，我反而覺得自己樣衰，心地又唔好（咁樣諗 師父）。
多謝 師父俾機會我！多謝 二哥（先師）同（先）表哥、（先）德哥！
感恩 祖師爺同伏英老師公，同菩薩！ 二哥教我講嘅，多謝 二哥！
師父，再講⋯⋯
我暈咗之後，其實好快，已經魂不附體。我仲同大家一齊睇住（我）自己嘅body（身體），覺得好奇怪，唔係呀嘛，自己（靈魂）睇住自己嘅身體？
初初幾秒係有啲愕然，笑兩笑以為玩，好快就唔識笑，因為我拍住我兩邊（兩個波友）膊頭，同佢哋講嘢，佢哋完全冇反應，好似聽唔到我講嘢，又感覺唔到我拍佢哋個膊頭咁。我就知道，舐嘢*啦！
全程，上救護車，真係好似做戲咁，我坐喺救護員隔離，自己睇住自己嘅身體，唉，冇啦，知道玩完啦！
師父，（起初，我）唔明學道點解咁重要。 二哥叫我用心觀察，睇吓有學（道同）冇學嘅分別⋯⋯
當然，我唔識睇啦。（之後） 二哥再教我（兩者）分別係真心定假意。
到咗醫院，又係，真係好似做戲咁。自己唔知自己死咗，坐喺張凳嗰度，睇住人來人往，但無人理（靈魂嘅）我，坐咗一段時間， 唔知幾耐，可能20、30分鐘，有個”阿叔”走埋嚟，彎低個身，同我講：『𡃁仔，新嚟㗎？坐吓先啦，冇咁快（知道自己死咗）㗎！』
我都唔明嗰個亞叔講咩，所以我冇反應。
師父，原來，（人）話死就死， 冇得傾。
師父，係，當我知道自己死咗，我真係好怨，『點解會係我，我都冇做衰嘢啫？』
原來， 又唔係咁㗎。一切都係同前生有關。
二哥話俾我聽，我前生係個二世祖，洗腳唔抹腳*，玩女人，唔識得尊重人。 一切都係自己前生唔識珍惜而種落（果報）。
祖師爺俾 二哥帶我遊地獄管理處，嗰度有個細細展覽廳，有幾個位放咗木製高架，架上有本好厚嘅書。書嘅內容，唔講得。另外，天花有幾個大螢幕，展示過往生⋯⋯
我睇完之後，其實都係半信半疑。應該係話，我唔接受嗰個係事實。但 二哥好有耐心同我講：『傻仔，冇得唔信，呢個係事實。只有你接受呢一個係自己，曾經嘅自己（前生做過嘅事），同埋誠心懺悔，先有機會可以改變現狀。』
係嘅， 師父，我死咗之後，真嘅，係唔甘心，所以我四圍去，想同人投訴，想話俾人聽我有幾咁可憐。但係冇辦法，屋企人又聽唔到我講嘢，我個老死都唔知道我喺附近，啲friend都睇唔到我。簡單講句，投訴無門。
因為我唔甘心，所以我四圍遊，有時仲衰衰哋，搞搞震。
有一次（夜晚），咁啱，喺間數字通宵店，想嚇個妹妹仔（玩吓）。啱啱 二哥做緊嘢（喺店外街道）經過， （用凌厲嘅眼神）望咗我一眼，即刻，有兩位穿着好似古裝官服嘅人出現我眼前，我即刻軟晒，左右夾住，唔使一秒，去咗個好黑嘅地方*。嗰度有個房，有個高台，有張（辦事）枱（凳）。
喺個房度，一個人都無。 企喺度等咗一段時間，先見到一個着住古代官服嘅人入嚟，係 二哥。佢後面跟入嚟嘅人（官差介紹）講嘅。
二哥坐喺張大木椅之後，同我講：『你有咩訴求？』
我無（即刻）答。
二哥好有耐性，唔再問。佢有佢坐，我有我企。
跟住， 我覺得唔係辦法，我就開聲問：『你係邊位？ 我唔識你。』
二哥話：『放心，我都唔識你，好公平。但你成日想見 師父，咁你就要識我先見到，或者，都未必可以見到 師父。 睇你嘅造化。』
師父， 說來話長，終於，我知道依個係你幫我嘅。我就求二哥俾機會我見 師父，二哥話要資料上呈，然後排隊，叫我要有耐性。 二哥仲教我誠心懺悔，俾心機做功課，希望可以盡快得到安排。
師父，(我)要講嘅說話仲有好多，我好想講好多嘢，但係知道唔可以一次過講咁多，講咁耐。而且 師父太用精神，我都覺得好對唔住。
師父，如果可以嘅話，我想接受現實，唔想再係咁樣行來行去，遊來遊去。如果可以盡快投胎，我都接受。今生發生咗（突然離世）嘅事都冇得唔接受。
『My friend，多謝你咁錫我，做兄弟有今生無來世。如果真係有來生，我都希望可以同你再做兄弟，甚至係親兄弟。至於家人，如果可以來生再做家人，我再報答你哋。』
多謝 師父，唔想阻 師父咁多時間同精神，辛苦晒，多謝晒！
感恩 祖師爺同伏英老師公！
感恩 所有（佛）菩薩！
感恩 二哥同菩薩！
感恩 師父！
感恩家人同所有愛我嘅人！
後會有期！
南無阿彌陀佛
14:09 畢
師父寄語：
知己難求
人身難得，知己難求。在世時，能遇上知心好友，有着相同的喜好，無分晝夜寒暑，互相支持鼓勵，真不容易。
少年，懷着美好的憧憬，與老友「講過將來要共患難」，還沒有來得及全部兌現，卻被無常召喚歸去。知音陰陽相隔，再見，或許只能在夢鄉之中。
故人已去，留在世上的人，堅強的活着，對得起自己、家人、知音和故友，才不致於辜負此生中美好的相遇。
舐嘢︰舐，粵音 laai2 、奶。舐，用舌頭舔食物。如，舐雪糕筒。
舐嘢，香港地道俗語。意思是因不慎而得到壞結果，如誤墮陷阱、踫了壁、受傷或發生意外等。
洗腳唔抹腳：意思是指洗腳後不用毛巾抹乾，讓腳上的水甩乾或任由腳上的水到處滴濕。
此句是廣州俚語，也是港澳地道的俚語。意指揮霍。花錢無度，胡亂用錢，毫無計劃。
去咗個好黑嘅地方：所指的是 二哥先師辦公的地方。
《晴明錄》「明鏡高懸」
464 total views, 1 views today