先師母攝於新加坡2013年5月
2022年7月2日 星期六 08:19
2022年7月1日，先母辭世禮及出殯火化事宜圓滿。2日早上，法慧來電傾談，說了幾句自己對於先母殯禮的感受，隨即，先母到來，有話要說。
先母許鳳雲法秀：「咁樣真係好好，阿媽好鍾意，真係好開心。其實，大家為阿媽做嘅嘢*，媽一早就知，『一切都係好好嘅安排』，你哋家姐講嘅。
而家，我真係好好，大家真係唔使擔心阿媽。（關於極樂，都係唔講喇。）
講番呢兩日，（除咗家人、親朋、好友，）好多『人』嚟*咗，［阿母］有嚟，你哋（先）老豆*有嚟，（先）阿公、（先）阿婆*都有嚟，仲有好多好多我唔識嘅『人』都有嚟，個個好開心，（嗰啲唔識嘅『人』）好有禮貌，企晒喺嗰啲藍色排凳後面，雙手放前面，一式一樣。阿媽好開心，感到好榮耀，一生無白捱，無白過。
（辭世禮當日）家姐講阿媽嘅生平，（分享和總結阿媽嘅一生，講到阿媽好好。）雖然有啲誇張，但又唔使因為阿媽咁樣講覺得唔好意思，仲雙手揞住塊面好尷尬咁笑，唔使咁嘅傻豬。
人生就係咁㗎啦，一眨眼就過。所以家姐成日講，叫我俾心機念佛，一定要記住，走嘅時候，邊度都唔好去，要去淨土。只有去到淨土，先唔使返嚟呢個世間受苦。你哋家姐仲同我講過，去唔到淨土好慘㗎。（我在生嘅時候）家姐話，無修行嘅人，無念佛嘅人，無做好事好心嘅人，死咗一定去地獄。當時我聽到都係有啲唔鍾意，唔想聽。家姐仲講：『媽你唔好以為個女係師父，就可以幫你，唔使去地獄。唔係㗎，一人做事一人當，你講咩都無用，自己做過嘅事自己負責。唯有方便法門，可以念佛，誠心誠意，一心要去阿彌陀佛淨土，咁樣先可以脫離六道。』當時我聽得好清楚，但係其實有啲唔明，但又覺得家姐好煩，講嚟講去三張被，無啲新意。不過，我當時都知道家姐為我好，想我去到淨土，唔使喺六道受苦。家姐好叻，好孝心。好細個就睇得出家姐係好唔同。一出世，家姐好少喊，人（嬰兒時）好靜，加上喺第一個女，你哋老豆開心到講唔出（咁開心），成日笑到見牙唔見眼。初初老豆唔敢抱家姐，因為家姐唔足月，七個月出世，3磅1個安（士），輕飄飄，軟腍腍*。老豆話驚整親佢，唔敢抱。間中抱下，覺得好似糯米糍，真係好驚跣手*跌落地。都真係到三、四個月左右，老豆先真係夠膽抱下。真係因為驚，所以老豆抱住家姐，坐喺床度，郁都唔敢郁。而家講番轉頭，睇番當時嗰樣，合住對腳，坐到直筆甩*，郁都唔敢郁，真係幾得意。你哋老豆仲望住個女，笑到見牙唔見眼，有金都唔識執個樣，真係老人家講嗰句有女萬事足。
阿媽真係覺得自己好幸福，走少咗好多冤枉路，真係明白念佛好重要。好彩家姐成日提我：『媽，記住呀，平時盡量唔好講嘢，俾心機念佛，千祈千祈要記住呀！』我好感恩，家姐直情係千吩萬咐咁樣。而家得咗，完完全全明白，家姐唔想我走失，唔想我淒涼。
Ling 啊！你哋幾姊妹要乖，要生生性性做人，真係唔好懶，家姐（呢幾日）都話，阿媽都得，你哋無理由唔得。Ling 呀，你哋個個都要保重，有時間多啲搵下家姐，將家姐當係（玄淚）阿媽，要聽家姐話，乖乖哋，生生性性做人。尋日經文都講『緣分厚薄無分先』，要好好誦經念佛，唔好辜負家姐對你哋嘅心意，家姐話係 祖師爺（伏英老師公）同諸佛菩薩慈悲，呢個當然，唔使講。家姐心地好好，淨係諗人，唔諗自己。我（在世）成日唔明點解家姐咁忙，究竟忙啲乜嘢，有啲乜嘢要做。而家走咗喇，睇得一清二楚，真係好忙，忙到瞓又冇得瞓，食又冇得食，真係好彩你哋 祖師爺同菩薩好錫你哋家姐，會安排 菩薩喺家姐身邊，愛錫家姐，保護家姐，照顧家姐。亞然係個大菩薩，佢真係好好，好錫家姐，呢一點唔係我往生後先知道，一早已經知道。呢個女婿真係無得頂，完全係一位菩薩，佢好錫我，我覺得自己好幸福，個個女婿對我都好好，但講錫，就真係只有亞然一個可以用錫、好錫嚟形容。以前我講過好多次，係真心講嘅，唔係氹人開心。家姐都話過我好多次，個個女婿都錫你，個個仔女都錫你，你以後千祈唔好再講『咁多個女婿，亞然就最錫我，亞然真係好好。記住呀，記住呀！』
傻女（法玄），唔好喊，（館床，媽坐我左邊）媽只不過將好多人哋唔知嘅，連你啲妹都唔知嘅嘢講出嚟，媽以前聽你話，邊啲嘢講得，邊啲嘢千祈唔好講；邊啲嘢做得，邊啲嘢千祈諗都唔好諗。媽知道你想媽好，媽知道。所以，我呢一生真係無白過。你哋幾姊妹都咁乖，都咁錫阿媽，特別係Kudie，成日帶阿媽四圍去，又去旅行，又去玩，又去食好嘢，阿媽真係好開心，仲打扮到阿媽成個後生女咁。阿薰阿蓉同阿Ling都係好乖，好錫阿媽，我都知道。媽而家想同你哋講，你哋錫阿媽，媽都走咗囉（往生淨土），從今開始，就好似家姐講嘅，以後要好好照顧自己（愛錫自己），用愛嚟養育兒女，嚟報答（已往生）父母養育之恩。
媽仲有好多嘢想同你哋講。怕家姐攰，因為好用元神。家姐話唔怕，媽有咩想講，可以繼續講。講番⋯⋯
係，仲有，家姐囝囝好乖，都係你哋家姐嘅護法，保護（媽媽）家姐，係一個好有愛，好有大愛嘅人。家姐好有福氣，身邊有兩位（家人）大護法。仲有啲徒弟，真係唔話得，只要家姐出聲，由頭跟到落尾。真係家姐自己修嚟嘅福氣。我都沾到福，我哋一家都沾到家姐嘅福。
仲有，呢兩日，辦事呢兩日。（上面批咗俾我講嘅）阿媽身邊都有護法隨行，係因為家姐，家姐嘅阿媽得道，身分好唔同，隨行有護法菩薩開路，一切牛鬼蛇神閃避。（呢兩日）媽去過好多地方，路邊好多『人』企晒喺度，合掌，有好多跪喺地下，因為想求見家姐。靈車開行，沿途路旁兩邊都好多『人』，開始同中段路比較疏疏落落，離遠，未到火化場，兩三條街，路兩邊都插晒旗，彩色，不同顏色，黃色，粉紅色，青綠色都有。旗飄下飄下。嗰段路仲多『人』，就係我頭先講，企嘅、跪嘅嗰度，好多『人』，有祝福我嘅，有送我嘅，有要求見嘅，想伸冤嘅都有。到咗火化場，四角都有大護法守住，好高大嘅護法，成個巨人咁，好莊嚴，好⋯⋯唔識講，好，好，好嚴肅守住。
（靈柩準備運送下層火化前）家姐（法玄）賜法嘅時候，上天佛菩薩都加持蓋印。（並賜字於靈柩上）『靈秀（長眠）⋯⋯』而家突然睇唔真，記唔番嗰幾個字，係上面唔俾我講得咁清楚。
喺靈堂嗰日，堂倌好叻仔，好佩服家姐，心底一大個服字。
家姐人好心善，阿媽唔係偏心錫家姐讚家姐，阿媽（對仔女）個個都錫。我係講，你哋家姐行出嚟，待人接物好有心，又唔貪，又低調。媽走咗（往生淨土）之後，知多好多，知得更清楚，你家姐係個咩人。就喺普光齋，個老闆都好尊重，好敬重家姐，見到家姐就好開心，好似老豆見到個女咁，又想同個女講多啲嘢，問候下，又怕煩到個女。真係緣份 。
講番，喺靈堂，左鄰右里，不但*隔離，樓上樓下啲租戶（往生者）都嚟我哋個禮堂度睇，又鞠躬，又合掌。我叫佢哋入嚟坐，唔好客氣，佢哋大部分怕怕羞羞*，私私縮縮*，只有幾個大大方方企喺度合十向我靈位一拜，大多好唔自然，因為禮堂氣場好唔同，佢哋好怕。
我又想講番，走（往生）嗰日。喺走之前，大約15分鐘前，老二就嚟咗，佢同我講：『媽，我喺老二呀。唔好瞓喇，返去喇，返屋企喇！』我擘大眼*見到老二，爭啲唔認得佢，好靚仔，好唔同，個樣唔同晒，但又知道佢真係老二。老二着嘅衫好特別，米米白白，有金絲線嘅圖案，好靚，感覺到同世間衣服嘅質地好唔同，好挺身，好亮白，但唔刺眼。
老二同我講：『老媽子，菩薩，返去喇！ 祖師爺叫我同你講，你可以返去喇，喺邊度嚟返去邊度。你而家合埋眼，靜心等候。一陣會有（天）人，有 佛菩薩嚟接你，你唔使驚，你誠心念經（佛）就得㗎啦！我而家先返去，嚮上面等你，你記住，聽住 師父把聲，一齊念佛，專心啲。我走啦，你快啲念佛，唔使理我，唔使理人。』即刻老二飛走咗。我即時合掌念佛，感覺到好靜，好舒服。
而家香港打風，邊度都唔好去。
唔講啦，你都攰喇！
感恩！
會，有機會再嚟再講。
南無阿彌陀佛」
先母說了 南無阿彌陀佛隨即回宮。
感恩 祖師爺！
感恩 伏英老師公！
感恩 諸佛菩薩！
感恩 二哥先師！
10:22畢
師父寄語：
離別叮嚀 真愛傳承
先母去世一周年。
去年今日，2022年6月15日，先母許鳳雲法秀壽終正寢，往生極樂淨土。
感恩 祖師爺、伏英老師公、諸佛菩薩慈悲加持，接引先母往生淨土！
先母辭世之後，得蒙安排，透過說給女兒聽的一番話，藉此與子孫及有緣人分享往生後的經歷和感受，讓我們明白生命可貴，不能浪費。若能把握此生給予的寶貴機會，接受道法佛法的薰陶，修正自己，誠心修學，認真念佛，功德具備，人生圓滿之日，心之所向，生於淨土，才算功德圓滿。
先母叮囑的「好好照顧自己，用愛嚟養育兒女，嚟報答父母養育之恩。」透過這番話，我們都理解重點意思是，對上一代，對自己，對下一代，做個負責任的人，以無私的真愛來承傳，功德無量。
辭世禮剛辦好，出殯後翌日，先母不忘以自己的經歷來教導子女，未來日子該以甚麼態度來面對，每句說話苦口婆心。
從話語中啟示的重點是，有正知、正信、正念和大愛者，心無雜念，自覺自悟，修得清淨，能斷六道輪迴，就是最好的，真真正正的，報答父母養育之恩。
感恩此生成為母女，可惜，歲月難留百歲人。先母已去，餘生未能再享母愛的潤澤，但過去相處之點滴，畢生難忘，更是強化修道決心的所在！
願先父母及所有往生淨土的未來菩薩，早日倒駕慈航，普渡眾生！
南無阿彌陀佛
2023年6月15日 凌晨
林法玄
做嘅嘢：辦理的事情。
嚟：到來。
老豆：父親。
阿婆：外婆。
跣手：失手。
軟腍腍：廣東話形容詞；形容一樣東西很柔軟。
直筆甩：筆直的，直挺挺。
不但：不單止。
怕怕羞羞：害羞。
私私縮縮：廣東話形容詞；形容某人做事膽小，遲疑，猜忌，多顧慮，不夠果斷，畏縮不前。
擘大眼：睜眼。
462 total views, 1 views today