2023年10月19日 14:18
靈體連線「現身」之後，頓時看到事件因由。
事緣：
一晚，女孩觀看某外國藝人的演唱會，表演在進行中⋯⋯
期間，未到60歲，看上去卻像70多歲的男靈體，在會場中見到前生已經認識的女孩，隨即飄移到女孩身邊。
像是遇上獵物的野獸，靈體驚喜若狂，做出各種各樣的鬼臉來嚇女孩，還肆無忌憚向女孩做出一些惡意的行為。
當然，人鬼殊途，女孩看不見「他」，也感覺不到「他」近在眼前，更不知道自己在興高采烈地看演唱會，為台上精彩表演者高呼打氣及拍掌的時候，竟被靈體報復，受到很不友善、很沒禮貌的對待。
星期日看完演唱會後的第二天，星期二，女孩病了，兩天高燒不退。10月19日星期四凌晨，女孩媽媽，法X突然來電，說女兒正在進食烏冬時，感到肚子不適，腹瀉後，突然覺得全身很冷⋯⋯
2023年10月19日 14:18
「師父，係，係我，係我攪佢嘅。
佢前生恃住自己係大小姐，對我哋啲下人態度極差，不瞅不睬，當我哋透明咁。
哈哈，真係天意。唔係我有心搵佢、跟佢嘅。係喺演唱會見到佢，一眼就認得出佢個衰樣，無變，都係咁樣衰。
（唔應該用呢種態度話人，死咗仲去攪人已經犯罪，因果罪。）
係，知道， 師父！
係佢，嗰生，係喇， 師父知道佢嗰一生。佢恃住自己係大小姐，萬千寵愛，對啲下人，真係好差。唔係，唔係淨係對下人，係對人都係好差，包括對佢家人。
（前生）係呀，我係好唔鍾意佢對家人嘅態度，好差，但又關我哋（下人）咩事啫，咪隻眼開隻眼閉囉；得閒就攞嚟當話題，三幾個下人走埋一齊，攞嚟笑吓，好過癮。哈哈！
係， 師父，講吓點解我仲未輪迴先⋯⋯
師父，我一個人，無親無故，好細個就被人騙咗，賣咗去做下人。係，就係去咗佢家中做下等，下下等嘅人。（呢家人）不知所謂。
我當時，大約16歲（男），有食有住，被人呃咗都無所謂啦，好過日日無飯食等死。
如是者，我喺佢哋家做咗16年，大約啦，（工作崗位）就開始好少少，唔使成日被人點來點去。但好景不常，一次（做嘢）唔小心，好高跌落嚟。係，係清潔屋頂，仲有係咩？唔記得⋯⋯
跌落地，痛到不醒人事。醒返，喺自己床， 郁都唔郁得。唔知自己瞓咗幾耐， 問吓同房下工，佢話三日三夜，（仲話我）『唔死得都好犀利』。
當然，我哋係下人，點會有人理你生死呀！（因傷成病） 病好咗 ，老爺話冇錢養閒人，叫我執埋包袱，躝屍趌路*。
我同老爺講，我跛咗隻腳，都係因為同你哋做嘢整跛嘅，我冇怨，但我仍然可以做其他嘢㗎！老爺話我『你都黐線㗎，你仲做得啲乜呀！』
夫人企喺老爺身邊，粒聲唔出。我當時都有求老爺同夫人俾機會我，我一定會比以前用心機。
（老爺見我嗰陣）當時喺大廳。突然，小姐經過，聽到吓，就跑過去，坐喺老爺大腿上，12、13歲喇，幾核突，嬌聲嗲氣同佢老豆講：『我好驚佢呀，隻腳跛吓跛吓，好得人驚。』
老爺見到自己心肝寶貝女又攬住，又仆喺（自己）膊頭。（老爺）摸吓佢（個女）塊面，同管家講，支多少俾我，執埋啲嘢，扯*！
對唔住，阻 師父！
師父，我離開呢個衰家之後，返返去自己個竇口。係有啲頹廢，都大約一兩個月，（我諗清楚，頭腦）開始清醒啲，開始搵嘢做，但係（話係話）後生啫，跛咗隻腳（噃），冇人用我。
師父，真係對唔住，阻住 師父！ 二哥叫我長話短說，唔好阻 師父咁耐。
師父，衰嘅嘢我唔識做，好嘅嘢我又學唔識，終於我學咗人賭錢。初初都係有贏有輸，之後輸多過贏，一個窮鬼，輸吓輸吓，得返條命，走去偷呃拐騙。
終於有一次，俾人識穿咗，響條後巷監生打死我。臨死嘅時候，我突然諗返起響嗰戶人家高處跌落嚟嘅情景，又出現返嗰個衰小姐話我得人驚嗰時（佢）個樣，我好怨恨，我話過如果見到佢哋，一定唔會放過佢哋。
雖然我係咁諗，但係講真， 師父⋯⋯ 師父，我冇搵過佢哋。
係天意俾我喺嗰個地方見到佢，我忍唔住手多多。
我而家好後悔，（當晚做錯咗，）俾 二哥『的』我過嚟見 師父。請 師父原諒！（ 師父）要打要罰，我都心甘情願，只係希望 師父可以幫我，我唔想再留喺度，如果可以再做人，我一定會爭爭氣氣，亦唔會咁容易怨恨人（唔應該怨人。）
師父， 二哥教我講感恩 祖師爺、伏英老師公同菩薩！感恩 二哥！感恩 師父，多謝 師父！阻 師父咁多時間，對唔住！
二哥教我講：『對唔住喇，以前嘅大小姐！我無心嘅，請你同家人都原諒我啦！』
我而家跟 二哥走啦，多謝 師父！如果有來生，又有機會見到 師父，我一定會好多謝 師父，會聽 師父話，用心學道，多謝 師父！」
靈體合十，跟着 二哥瞬間離去。
15:15 畢
15:19 靈體［亞威］，還有很多話想說。
15:33 「亞威」再來，合十：「 師父， 祖師爺話我無資格立即輪迴。」話畢，神情憂傷，恭敬合十後隨即消失。
師父寄語：
因怨生恨 苦果循環
生活中的種種原因，偶然遇上不高興事，或遭到被排擠或欺凌，感到難受，內心難以平衡。若然一生的時間仍未能放下恩怨情仇，只會做成因果循環不息。
就以這靈體「亞威」為例，過往生的際遇，心中留下怨恨，也許是未能及時輪迴的原因之一。沒有輪迴，四處飄移，又遇到自己前生曾經記恨的人，一時失控犯錯。
在因果理論來說，這靈體又要受罰了。在六道中的任何界別，人也好，靈體也好，有法可依，任何違心犯法的事，都要負上責任，逃不出天眼的。
躝屍趌路：廣東俗語。廣東人毫不客氣的用詞，來趕走不受歡迎人物。躝，在地上爬行；趌，形容走路時一高一低踉踉蹌蹌的樣子。
扯：離開。
454 total views, 1 views today