2023年12月22日 星期五 15:54
十多分鐘前，知道「他」有話要說，忙中把手上工作暫停。
玄眼濕了，鼻水也隨之而來。
「師父您好！係，係我！
好多謝 師父記掛！凍咗好多， 師父，要着夠衫，唔好冷親！
師父，好多謝您，多謝您個仔！多謝好多好多愛錫我嘅人，多謝晒！我無忘記你哋，更加唔會忘記 法玄師父大恩大德，我會銘記於心，將來投胎，無論（我）點樣變樣變型，無論 師父變咩國籍（人士），我會，一定會認得 師父，多謝 師父！
師父，好多說話想同 師父講，唔知點講至好。首先，除咗要多謝，要感恩 師父，我仲想講俾 師父聽，我好掛住 師父，成日都想見吓 師父。真嘅，見到 師父，我個心就會好平靜、好舒服、好安心、好自在，（「他」合十誠敬）多謝 師父！
師父，係呀，我都係早 師父一步，知道自己前生係咩人，自己所作所為。係，就係 師父早幾日喺深圳嗰時知嘅，我前生係蘿蔔頭。係二次世界大戰時，我係一個日本高級軍官，殺人唔眨眼，殺人無數。 師父已經知道晒，（「他」合十）真係好犀利！係，嗰一生，一出世時，我個樣皺晒皮、 又瘦又黑萌萌，好唔得家人鍾意。自小，除咗係個老母對我好啲，錫吓我之外，我根本得唔到家人嘅愛。 我個死鬼老竇，衰老竇，高高大大，大大隻隻，脾氣衰到冇人有，成日飲醉酒就搵我嚟出氣，又打又鬧，有時仲衰到冇人有，試過幾次，我好細個，佢扚（抽）起我， 想掟我落地掟死我。 到我幾歲，讀緊小學，佢發酒癲，兜心口打我，好似想打死我咁。 因為我生得細粒，而且嗰時仲係好細個，我淨係雞手雞腳撐撐下，真係咩都做唔到。我老媽子出手想撳住佢都撳唔到，仲俾佢反手打咗我老媽子。就喺嗰時，我發誓，從此唔會再俾人哈我同我老母。我當時係咁諗，如果（當時）我好大隻，我有能力，我一定打死（老豆）佢。
講真， 師父，我由細到大都俾人恥笑，話我樣衰衰，唔似人。又係嘅，我睇返自己嗰生個樣，我都想打佢（自己）。 師父，就係咁，由細到大無人錫，無人愛，仲俾人哈，自己唔會識得愛人，唔會識得去學做好人。
到我参軍，受訓嗰時，上頭講咗好多仇恨嘅言論，又話我哋日本人長期受人欺負，再唔反抗就會被人魚肉。我當時得十幾歲，人講咩我就信咩，完全冇經大腦，唔識得分析⋯⋯
16:36
知道 師父好攰，使唔使唞吓先？（不用）
師父， 俾人洗腦好無辜㗎！但原來又唔係無辜得晒， 都係因果。可惜自己知得太遲，明白得太遲。所以， 師父成日講『因果好恐怖㗎！』係真嘅！
師父，真係使唔使唞吓先？（不用）知道 師父好攰，還神（前）好忙，我仲阻住 師父，真係唔好意思，對唔住！
師父，就係我仇恨心好重，怨恨心好重，我喺軍隊受訓之後，淨係諗住點樣殺人，完全無咗人嘅正常諗法。 亦都係因為我個人夠狠，我喺軍隊裏面漸漸俾人知道（有我這個人）。
（我嗰一生）對個家無感情， 怨恨老母點解咁怕事，任由衰老竇哈？
師父，原來，世間真係無後悔藥，可以忘記自己所做過嘅衰嘢。
我（剛剛過咗嘅）呢生人，其實無做衰嘢，但我成世人都鬱鬱寡歡。有啲好朋友，有時會開解我，話我諗得太多，叫我放開啲。其實我都唔明點解自己會咁，而家終於明白啦！ （係前生太重孽。）
師父，如果可以從頭嚟過，我唔會揀呢條路（傷害自己）。又或者，我係唔會入娛樂圈，唔會對自己要求咁高。但係，諗深一層，如何無呢一生嘅經歷，我未必會識得 師父、搵到 師父。所以，應該好似 師父咁講，『我哋要感恩！』
師父，我仲有好多嘢想同 師父講，同 師父分享。但 二哥嚟咗，話唔好阻 師父咁耐，要返去喇，要做功課喇！係呀 師父，我而家都有跟 二哥學做功課，同時會整理人哋送俾我嘅功德（資料存檔上呈）
師父，唔阻 師父咁耐喇！ 師父忙都要唞吓。好期待申請到再嚟参見 師父，再同 師父傾偈，分享多啲。多謝 師父！感恩 師父！感恩 祖師爺、師公同菩薩！感恩 二哥先師！
師父請保重！」
17:02
418 total views, 1 views today