「你事事樂觀，零捨有創意㗎，譬如貶咗你去廣東，嗰陣時喺宋朝，被貶去廣東好慘㗎，廣東係南蠻嘅地方，蘇東坡被貶，嚟到南方，遠離帝京，嘿，但係呢位人兄好嘢，好樂觀呀，「日啖荔枝三百顆，不妨長作嶺南人」*，嗰啲衰嘢完全唔諗，有荔枝食，做嶺南人做廣東人有乜所謂呀？very happy！
兩個sale士(售貨員)，兄弟拍檔孖公仔走去非洲賣鞋，一個sale士話『死』啦，都無人著鞋嘅，點做生意呀？另外一個，樂觀嗰個諗『嘩，唔係喎，好嘢喎，無鞋著呀，我大把生意做啦！』咁樣呀，喺唔同嘅角度，一個悲觀一個樂觀，一定係樂觀嗰個會容易做嘢好多吖。
一杯水(拿起一隻盛滿水的玻璃杯)，飲咗一半(即場飲水)，你千祈唔好睇呢截呀(指着沒水的部份)，有啲悲觀嘅人，當呢度係半杯空，我唔係㗎，我無咁笨呀，我飲咗呢啲，我係半杯滿呀！」(1:10:40 1:12:03)
*「日啖荔枝三百顆，不妨長作嶺南人」：蘇軾的名句，出自蘇軾《 惠州一绝 》。原句「日啖荔枝三百顆，不辭長作嶺南人」，「不辭」，解不妨。
黃霑 創意與創造力講座 Innovation and Creativity (2000年)
270 total views, 1 views today