「練呢，就係日日練功夫，你要永遠唔偷懶，不離不棄，點解人人做掌上壓要兩隻手，李小龍一隻手指就可以做到掌上壓呀？佢練你唔練吖嘛，就係咁簡單喇！
我記得我初初寫稿嘅時候，寫1000字，要1個半鐘頭，我有日問香港嘅文壇巨擘，高雄先生，我哋叫佢做三蘇叔叔嘅，有時簡單(稱)三叔，我話：『你寫1000字幾耐呀？』『15分鐘啦。』『吓！我寫1000字1個半鐘頭，你寫1000字15分鐘？有冇搞錯呀三叔，咁都得？』『得，你寫得多就得㗎喇，你返去自己練啦。』三蘇叔叔就好威嘅，佢喺行內叫車衣手，因為佢嫌支筆重呀，佢淨係搵支原子筆芯嚟寫稿，拎咗(筆芯)出嚟，放鬆手，咁呢隻(右手)寫，咁嗰隻呢(左手)好似車衣咁推(雙手動作模仿)，真係咁㗎，車衣手係香港文壇嘅奇聞嚟嘅，我未見過，我聽好多人講過，而嗰啲人呢，我相信佢哋係無講大話呃我，佢真係車衣手。咁我就好唔順啦，三蘇先生梗係天份多過我好多啦，但係無理由吖，佢係人我係人，我減半都好吖，我半個鐘頭寫到1000字我都發啦，我而家個半鐘頭喎，佢話練就得，我就信佢，跟住嗰日，每一次寫稿，都睇住個錶，寫，一日，兩日，寫咗9個月，都係個半鐘頭，好唔順氣，個心好滾，但係三叔話好易㗎咋，你練就得喇，死都唔服氣，繼續寫落去，結果9個月之後，忽然之間一日，一睇，9個字(45分鐘)我寫到1000字喇，然後，bomb！半個鐘頭，寫到1000字喇，最後，1年時間，我都15分鐘寫到1000字。我嗰時最快1個鐘頭可以寫到4000字嘅，係連埋諗，睇都唔睇，改都唔改，就俾交稿嗰個洪嬸拎出去㗎喇。」(1:14:33-1:17:40)
黃霑 創意與創造力講座 Innovation and Creativity (2000年)
349 total views, 1 views today