2024年3月21日 星期四 02:29
先姨媽：「月嫻，係呀，係姨媽呀，終於等到你得閒啲！
貴人事忙！
我想話過你知，我而家好好，亞新（法尊先師）有嚟搵咗我，叫我唔好擔心，俾心機念佛，誠心求生淨土。
幾十歲人，成百歲，都唔知咩叫做求生淨土。亞新話係上去天堂享福，唔使再落嚟凡間輪迴做人。佢話做人要經歷甜酸苦辣、七情六慾。我點知咩叫七情六慾呀！
亞新就話，即係（做人要經歷）開心同唔開心，得到同失去，完全唔係自己掌握到嘅。
我明啲唔明啲。
亞新話唔使諗咁多，總之就係俾心機念『南無阿彌陀佛，一心一意求生極樂世界，去享福。』
我想話過你知，我仲未得，仲要多啲功德。亞新話最最最重要嘅係自己一心一意，要求生淨土，唔要再輪迴做人，做人唔一定係自己話事，幸福都要好大付出，要有好多功德先得。
哎，真係唔死都唔知咁多嘢。長篇大論，我哋識咩啫。不過我知道，亞新都係想我好，所以特登嚟搵我，同我講。佢話，信好過唔信，靠人不如靠自己。我信，我成世人都無靠人，一手一腳湊大三個仔女。你姨丈死得早……
亞新叫我唔好講返舊時，（而家）最緊要係俾心機念佛，求生西方。
我而家係嚟話過你知，我一定得嘅，將來，喺上面見，淨土見。
南無阿彌陀佛」
看上去60多歲，精精神神，先二姨媽今個月初離世，壽終積潤享壽百齡（足齡98歲）。
02:51
339 total views, 1 views today