2024年6月21日 06:03
先藍姑娘：「 師父您好，係，係我！感恩 師父！多謝 師父！
師父您好靚，（館）呢度好靚！
師父啊！我好開心呀！終於俾我等到您，肯同我傾偈，俾機會我講嘢！
多謝你哋嘅 祖師爺同埋二哥！
好多謝！好感恩！
係（ 二哥教我），仲有你哋（ 伏英老）師公！感恩！感恩！好感恩！
師父呀！咩原來咁難嘅！？我係話，做人都已經唔容易，又以為死咗可以一了百了！原來唔係㗎！
初初，我都唔知自己死咗。以為自己發夢，會醒，醒咗就無事，可以由頭嚟過。但原來唔係㗎！唔係咁簡單㗎，師父！
師父啊！我好多謝亞菲姐，係佢同我講，『可以試吓搵師父您，得唔得（見到）都唔知，咪試吓先囉，唔得又唔使死嘅。唔通死完可以再死咩！』
咁我就膽粗粗，試吓搵 師父！
嘩！唔講真係唔知，原來真係唔容易㗎！先唔好講有冇機會同 師父傾偈。就係想離遠望吓都唔得，係無可能。係睇唔到 師父廬山真面目。好似有好多層霧遮住咁。有時朦朦地睇到吓，都唔係好清楚㗎！
離遠，係好遠好遠，就有護法菩薩保護住 師父，魑魅魍魎不得走近嗰種。點解？點解我識講？係我以前識得一啲人，呢，嗰啲古靈精怪嗰啲，鍾意玩嘢、拜拜、揼揼又無料嗰啲。真係⋯⋯
而家睇返轉頭，真係覺得好好笑，無料嘅人，就搞到好大陣仗咁，驚死人唔知佢係乜水！
對唔住，我無心得罪，只係見識過，平心而論啫。
師父，（靈哭）好多謝您送咗咁多經文同咒語俾我。萍水相逢，互不相識。真係好難得，好多謝 師父！
好過有啲人，話幫我，其實相金先惠，到我無咩錢，又無人幫我（俾錢）嘅時間，佢，呢，嗰個所謂師父，話我無得救，唔係同我講，係同人講，話我黐X咗線，醫返晒藥費。對住我就話『亞女，無事嘅，慢慢嚟，唔急得嘅⋯⋯嗱，你係咪覺得好過以前丫！呢啲咁嘅嘢，易請難送，你都知㗎！邊個叫你傻吓傻吓咁聽人氹呀⋯⋯』
師父！ 二哥叫我唔好長篇大論，簡潔啲， 師父多嘢做，唔可以咁用精神，聽你講咁耐。（係嘅 二哥！）
師父，咁我再簡單啲講。係嘅 二哥。（『唔好再講咁多無謂嘢，講重點！』）
師父，我呢，首先，好多謝 師父咁幫我！閻王話我未夠分，仲要有一段長時間居留，唔好諗住好快走得。但 師父呀！好悶呀！好黐線㗎！都唔係好似做人嗰時咁（生活）。真係好黐線㗎！我唔想用好慘嚟形容。真係唔想（咁形容）！
師父，請您老人家大慈大悲幫吓我⋯⋯（靈大聲哭） 師父，好唔好呀？想 師父您鈔經送俾我，或者有 師父金筆墨跡，閻王可以網開一面，俾我早啲輪迴做人，唔使喺下面再捱苦。 師父，請您大發慈悲啦！49日啊 師父！（合十跪地上）
師父， 二哥同菩薩嚟帶我走喇！您個徒弟仔亞彩法力師姐叫我快啲行，咪係度拖時間。
（起來合十拜拜）多謝 師父！感恩 師父！
南無阿彌陀佛
感恩你哋 祖師同先師
感恩 老師公同老師父
感恩 二哥同所有菩薩
多謝 師父！感恩 師父
南無阿彌陀佛」
06:40 畢
258 total views, 1 views today