2024年6月24日 14:36
「師父，我好慘㗎！表面風光，內裏滄桑！
師父，有頭髮邊個想做癩痢？ 師父，呢一生人，好好醜醜，我都真係有好多人羨慕。但心理唔平衡，有人知咩？捱生捱死得個吉，有人可憐你咩？無，係無嘅！
阻唔阻 師父呀？
我都算好彩，差唔多搞掂（斷氣）嘅時候，有個人，唔係，係神，秤咗我（個魂）起身。當然，我唔知自己死咗，死緊，定係冇死到，原來魂就早已離體，氣就未斷。
嗰位神仙、仙家，係⋯⋯係人人叫佢做 二哥嗰個。佢好好，啲起我，問我，『傻仔，咩事咁睇唔開啊？條命仔好寶貴㗎。』
師父，（當時）我都唔知自己咩狀況，仲好似短期失憶咁，唔記得自己（最近）發生咩事，又唔知點解自己成身濕晒。」
這位男善靈開始哭起來⋯⋯
「師父，我好後悔！而家記返起發生咩事，同點解自己喺水度上嚟。但又點呀！ 師父⋯⋯
師父，我仲好後生㗎！點解一吓諗埋一邊嘅？我而家好難過，睇唔到聽日，睇唔到未來。
師父！我好多謝您俾機會我講嘢！好多謝 二哥帶我返嚟！好多謝亞Sir！仲有，好多謝 菩薩！最最最重要，多謝，感恩你哋 祖師爺！」
放聲大哭的「他」：「 師父，我而家可以點呀？我可唔可以留喺（館）度呀？我⋯⋯我，我唔知自己想點？可以點？
係嚟咗（館）呢度，我安心咗啲，平靜咗啲， 師父，請你幫吓我，問吓你哋 祖師，問吓 菩薩，可唔可以俾我留喺度？
我好驚，咁大個人都未試過咁驚，黑鼆鼆*，成日都係（見到環境）黑鼆鼆。
師父，您好好人，請您幫我求吓情啦！我邊度都唔想去，屋企都唔想返⋯⋯
師父， 二哥叫我面對現實。我都想。可以咩？原來，一吓諗唔開，死咗之後，仲慘過做人嗰時。
師父，我而家無家可歸。無晒機會，無喇，咩都無喇！ 師父⋯⋯
（法玄：我無權，無能力決定你嘅去留。一切都有命運安排。感恩 祖師爺、伏英老師公同菩薩慈悲！你有機會出聲申訴，已經好有福報。）
師父我知，我梗係知啦！ 師父，一係咁啦！我（49日）呢段時間留喺度，幫師父睇住個館，（49日）夠期，我去輪迴做人，得唔得呀？
（唔係我哋話事㗎！）
師父， 二哥叫我叩頭俾你哋 祖師同菩薩，夠鐘喇，走喇！有得嚟仲講咁多嘢已經好好㗎啦！
（善靈很不情願的，拖住腳，慢動作，行近置於壇前的綠色長枱，瑟縮的「他」，腳步沉重，彎着身子，很慢很慢的，穿着深色衣服的「他」，慢慢的跪在地上向 壇上供奉着的 祖師和菩薩像叩頭。仍然合十的「他」，起來轉身向法玄拜拜。）
師父，多謝晒，唔好意思，阻您，辛苦晒！
我舒服咗好多喇！
多謝（法然）師伯！多謝亞Sir！多謝咁多位亞Sir！
（仲有你家人呢！）係，點都好，過咗去喇，嬲都冇用，我人都死咗，點就點喇！都曾經開心過！
多謝！感恩 你哋祖師爺！
（多謝！感恩 你哋）師公同菩薩！
多謝！感恩 師父同 師伯！
好難得可以嚟，好感恩！如果有來生，我可唔可以做您徒弟啊？ 師父！
善靈雙眼充滿淚水，哭着⋯⋯
被 二哥和幾位陰差帶着離去。
15:20
黑鼆鼆：粵語疊詞；形容事物顏色發黑，或指環境非常黑暗，沒有光線。
273 total views, 1 views today